Hafoin finaliza atividade kampaña vasinasaun ne'e, Ministru Francisco Martins da Costa Pereira Jerónimo, husu komunidade sira atu nafatin hakat ba simu vasina no labele rona informasaun falsu husi média sosiál. "Labele rona lia anin ne’ebé agora buras ho intensaun aat atu halo ema tauk, trauma no dúvida ba vasina”, dehan nia iha aldeia Manubata no Saharia pertense ba Suku Hoholau, Postu administrativu Aileu Vila, munisípiu Aileu, sábadu (30/10).

Tanba prezensa Governu iha ne’e atu ko’alia kona-ba importánsia husi vasina ne’ebé Governu implementa hodi proteje nia povu rasik. Maske Ema barak ko’alia katak sira iha direitu atu la simu vasina tanba la’ós obrigatóriu, maibé tenke hanoin katak direitu ida ne’e labele fó fali risku ba ema seluk nia vida, tanba sempre iha viajen diariamente ba nesesidade moris nian.

"Tan ne's bainhira sidadaun ida hakarak defende no ezije ita-nia direitu tenke iha mós devér morál hodi fó balansu no kontribuisaun ba programa nasionál imunizasaun hodi luta kontra inimigu invizivel ne’e”, dehan nia.

Sekretáriu Eatadu Arte no Kultura (SEAK); Teófilo Caldas, informa katak atu kombate Covid-19 ne’e programa mundiál, no la’ós de’it akontese Timor-Leste, tanba pandemia ida ne'e Timor ladún sofre hanesan rai seluk.

"País dezenvolvidu barak lakon sira nia ema importante sira hanesan profisionál saúde, amu lulik no madre, membru Governu inklui ema sira ne’ebé iha podér no influensia ba dezenvolvimentu nasaun nian”, hatete nia.

Tanba ne'e, Governu toma imediata medida preventiva hanesan Estadu Emerjénsia, Serka Sanitária no Konfinamentu Obrigatóriu ho atu bele halo kontrolu ba moras kontajioza ne’e, tanba da’et husi ema hirak ne’ebé halo viajen husi fronteira.

Ho vasina ne’e hanesan mós sangra ne’ebé uluk simu iha tempu kolonializmu nian, tanba ne’e, programa imunizasaun ne’e atu halo isin forte hodi luta hasoru moras ne’e.

“Uluk ita hamutuk luta hodi salva mós ita-nia gerrilleiru sira no ita-nia povu to’o hetan ukun-an, tanba ne’e luta ida ne’e tenke kontinua ba kualkér inimigu ne’ebé mosu”, informa nia.

Hafoin termina kampaña ne’e, totál vasinante na’in-50 mak simu imunizasaun ne’ebé mai husi aldeia Manubata no Saharia, nune’e provizoriamente, taxa partisipasaun ba imunizasaun kontra Covid-19 ne’ebé atualiza ikus iha pájina Palásiu Sinzas horisehik nian hatudu nível nasionál atinje ona pursentu 73.3 entretantu munisípiu Aileu okupa iha pozisaun da ualu ho pursentu 65.7, enkuantu Vikeké mantein iha pozisaun dahuluk ho pursentu 88.9 no Ermera sei okupa pozisaun ikus ho pursentu 56.3.

Marka prezensa iha kampaña ne’e, ekipa téknika husi entidade públika MAPKOMS no SEAK, Diretór DNDI-MAPKOMS inklui autoridade sira munisipál Aileu nian hanesan, , Diretór Saúde ho ekipa, lider komunitáriu, reprezentante veteranu no mós komunidade sira. (*)