"Agradese ba Governu Indonézia tanba bele oferese ona Ró Ambulánsia, Ró ida ne'e bele apoiu ona Ministériu Saúde (MS) liliu instituisaun saúde, SNAE hodi bele responsabiliza ba servisu transferénsia moras nia iha rai laran, ró ambulánsia ne'e ita bele uza hodi halo evakuasaun ba ita-nia pasiénte sira tantu iha Ataúru no mós husi RAEOA, mai hospitál Nasionál Guidu valadares (HNGV)”, dehan Diretór Servisu SNAE, Horasio Sarmento Da Costa, iha portu Dili, kinta (25/11).
Tanba durante ne'e MS iha de’it kooperasaun ho aviaun Nasionál Airo Flyght (NAF) hodi halo evakuasaun ba pasiénte sira maibé aviaun nia operasaun ne'e so halo de’it iha loron hahú husi tuku 7:00 dader no to'o tuku 17:00 loraik no kalan labele halo operasaun.
"Aviaun ne'e la halo operasaun iha kalan, dala ruma ita-nia pasiénte husi Ataúru no Oekussi presiza iha tempu kalan ita labele responde, dala barak ita iha xamada iha tempu kalan ita labele responde. Ita husu apoiu Unidade Polísia Marítima sira, maibé sira mós iha prolema labele responde, entaun ita-nia ema sira hakotu iis tanba ita-nia kapasidade atu atende ne'e seidauk bele”, esplika nia.
Tanba ne'e ho apoiu Governu Indonézia ninia ho Ró ambulánsia ne'e bele responde ona ba komunidade sira husi Ataúru ho Oekussi ne’ebé mak presiza hetan atendementu Saúde di’ak liután iha HNGV.
Entretantu ró Ambulánsia ne'e akumula ema hamutuk 25 pesoál nomós kapitaun Ró na’in-ida ho Navegadór na’in-tolu. Ró ne'e finasia husi Governu Repúblika Indonézia ho totál orsamentu US$2,2000. (*)