Tempotimor(Dili)- Ministru Asuntu Parlamentar no Komunikasaun Sosial(MAPKomS), Francisco Martins Jerónimo hatete, iha lei Serka Sanitária (SS) la bandu ema atu desloka husi Dili ba Munisípiu, importante hetan teste swab no hetan autorizasaun husi sentru integradu jestaun ba Krize (SIJK).

"Iha lei SS/EE la bandu ema atu desloka husi Dili ba Munisípiu sira, naran katak tuir teste swab e hetan autorizasaun husi SIJK, se ida ne'e la akontese labele, se nia husu ona autorizasaun iha posibilidade atu ba Munisípiu ha’u hanoin laiha bandu”, dehan Francisco Martins Jerónimo iha plenária PN, segunda (17/05).

Entretantu husi Munisípiu sira ne'ebé la afeta ba covid-19 atu mai Dili la tuir teste swab mós bele, importante hetan autorizasaun, maibé bainhira sai fali husi Dili ba Munisípiu tenke tuir teste swab tanba Dili mak nu'udar sentru ba moras Covid-19.

"Agora husi Munisípiu sira atu mai Dili ne'ebé mak la'ós afetadu mós la presiza, swab, importante iha autorizasaun tama Dili, maibé kuandu atu sai fali tenke swab, tanba Dili mak sentru ba moras covid-19, ida ne'e mak regra ne'ebé dadaun la'o hela”, Informa nia.

Nune'e mós la bandu ema atu lori sasán mai fa’an iha Dili, iha ema balun foti ida ne'e hanesan kazu balun ne'ebé akontese fali tanba ema la komprende halo implementasaun iha nivel terenu ne’ebé lei rasik la bandu ba ida ne'e.

Tanba ne’e sirkulasaun ema ba mai atu fa’an sasán husi Munisípiu mai Dili la bandu, importante iha autorizasaun tama mai iha Dili, maibé bainhira sai fali husi Dili tenke tete swab. (*)

Tempotimor (Dili)-Komandu Polísia Nasionál Timor-Leste (PNTL) apliika nafatin dekretu governu ne’ebé implementa serka sanitáriu no konfinamentu domisiliáriu obrigatóriu jerál.

Maibé dezentendimentu entre komunidade ho Pólisia Nasionál Timor-Leste (PNTL) bainhira hala’o teste swab husi sentru Integradu Jestaun ba Krize (SIJK) iha Sentru Formasau polísia Komoro, tanba la sastifas ho atendementu.

Portavoz Komandu Jerál Polísia Nasionál Timor-Leste (PNTL), Superintendente xefe Arnaldo de Araújo hatete, PNTL implenta hela dekretu governu númeru 14/2021 medida ezekusaun estadu emerjénsia nian no konfinamentu domisiáriu jerál.

“Orientasaun ne'ebé komandu fó sai tun mai iha membru sira iha terrenu atu implenta, halo tuir mak hanesan halo cek point aumesmu tempu ema sira ne'ebé mak atravesa liuhusi cek point ne'e bolu hotu mai swab”, dehan Arnaldo iha Sentru Formasaun PNTL, Komoro, tersa (04/05).

Ho atividade ne’e atu hamenus movimentu ema hotu, tanba dadaun ne’e iha situasaun konfinamentu domisiáriu jerál, mak ema hotu tenke iha uma no labele sai.

Maske, iha komunidade balun koopera, balun lae, tanba hakarak fila uma lalais to’o mosu dezentendimentos entre PNTL no komunidade. Maibé komunidade la sastivas tanba fatin ne'ebé limitadu PNTL husik duni komunidade balun liu de’it.

"Não quer dizer sira fila lahetan ona swab, la’e. Karik Polísia hetan iha dalan sira mós tama hotu iha swab ida ne'e”, dehan Arnaldo.

Husi observasaun www.tempotimor.com nota kata iha komunidade balun mak halo protestu tanba la sastivas ho atendementu PNTL no komunidade balun la tuir teste swab.

Entertantu ohin PNTL hamutuk ho SIJK hahu implenta cek point aumesmu tempu teste swab ba komunidade sira ne'ebé halo movimentu iha área Komoro Sentru Formasaun PNTL Dili. (*)

Tempotimor (Dili)-Sentru Integradu Jestaun ba Krize (SIJK) rejistu kazu rekoperadu durante oras 24 nia laran, iha loron 03 fulan-maiu tinan 2021 hamutuk 82, no kazu pozitivu Covid-19 foun 80.

Haree ba kazu foun pozitivu covid-19 na'in-80 ne'ebé kompostu husi munisípiu Dili 75, munisípiu seluk 5, no totál kazu konfirmadu kumulativu iha loron 03 fulan-maiu tinan 2021 (sura husi 21 Marsu 2020) hamutuk na'in-2524.

“Kazu detetadu foun na'in-80, husi munisípiu Dili 75, munisípiu seluk 5, mane 40, feto 40, kazu rekuperadu na'in-82, kazu ativu 1255”, dehan Koordenadór Forsa-Tarefa ba Prevensaun no Mitigasaun Surtu Covid-19 iha Timor-Leste, Rui Maria de Araújo liuhusi komunikandu imprensa, segunda  (03/05).

Husi totál kazu detetadu foun ho idade tinan 12 na'in-1, ho idade entre tinan 12-59 na'in-78 (97,5%) no idade 60 na'in-1.           

Rezultadu husi totál kazu detetadu foun 38 (47,5%) tanba halo teste ho razaun atu halo viajen ba munisípiu ka estranjeiru hafoin deteta pozitivu.

Durante loron rua nia laran, Laboratórium Nasionál Saúde (LNS) halo 468 testes PCR iha Dili ho detalladu hanesan, vijilánsia sentinela 7, rastreiu ba kontaktu (Contact tracing) 142, rastreiu aleatoriu (Random Screening) 109, viajen sai husi serka sanitária Munisípiu Dili 191, viajen internasionál 7 no Follow up iha kuarentena 12. 

Totál testes PCR ne’ebé halo iha loron 3 fulan-maiu iha Munisípiu sira seluk hamutuk 256, ho  detalladu  hanesan, Baukau 136, Maubisse 99, Suai 13 no Vikeke 8.

Aliede ne’e informasaun husi izolamentu iha loron 3 fulan-maiu tinan 2021 halo tratamentu ba kazu detetadu na'in-23, iha área obstrisia na'in-5, sirurjia 1, medisina interna na'in-13 pediatria na'in-5

“Sira na'in-5 iha obsterisia, kategória moderadu hotu, sira-nia kondisaun estável, sira na'in-14 iha medisina interna 4 grave (uza hotu oksijéniu) na'in-9 moderadu”, informa nia.

Maibé, kazu 5 pediatria, 4 moderadu, 1 grave, na'in-1 grave uza CPAP no 4 moderadu la uza ona oxijéniu. (*)

Tempotimor (Díli) - Sentru Integradu Jestaun ba Krize (SIJK) iha loron kinta (01/04) rejista ona pasiénte Covid-19 na’in-ida ne’ebé grave no na’in-tolu moderadu iha sala izolamentu Vera Cruz.