Amu Parokia São Paulo Lospalos: Tempu atu Lolo Liman Ajuda Kbiit Laek

Amu Parokia São Paulo Lospalos, Munisipiu Lautem, Thomas Gusmão de Carvalho, bainhira dada lia ho Tempo Timor iha Lospalos (24/4) Amu Parokia São Paulo Lospalos, Munisipiu Lautem, Thomas Gusmão de Carvalho, bainhira dada lia ho Tempo Timor iha Lospalos (24/4) Foto Tempo Timor

Tempotimor (Lautem)-Maske implementasaun estadu emerjensia iha faze dahuluk konsege evita transmisaun lokal Corona Virus Diseases 2019 (Covid-19), maibé komunidade sira, liu-liu kbiit laek sira, hahú halerik ba ameasa hamlaha.

Planu estadu TL atu hanaruk estadu emerjensia mós hamosu preokupasaun tanba bele fó ameasa ne'ebé boot liu tan ba komunidade sira, tanba sei laiha rendimentu no fó impaktu ba sira-nia kbiit atu sosa hahan hodi atende nesesidade uma-laran.

Amu Parokia São Paulo Lospalos, Munisipiu Lautem, Thomas Gusmão de Carvalho hatete, desizaun estadu TL hodi implementa EE lori konsekuensia ne'ebé prejudika komunidade sira-nia rendimentu ekonomia, tanba maioria uma-kain iha TL depende ba atividade negosiu.

Maske nune'e, nia dehan, iha parte seluk implementasaun EE mós konsege prevene trasmisaun lokal Covid-19.

Tuir nia, iha tempu ida ne'e importante atu prevene transmisaun lokal no redus númeru transmisaun importadu Covid-19 ne'ebé sa'e ona ba 24 kazu.

Tan ne'e, Amu Paroku ne'e aseita ho proposta governu atu hanaruk tan periodu EE ba loron 30 oin mai.

“Ha’u pesoal agradese, tanba ho ita-nia ekipamentus no rekursu umanus husi parte saude nian ne’ebé minimu tebes, maibé ho ita-nia preparasaun no kooperasaun hodi kumpre estadu emerjensia konsege salva povu nia vida husi risku ne’ebé boot hanesan akontese iha nasaun balun," dehan Padre Thomas iha ninia rezidensia, Lospalos, Sesta (24/04).

Kona-ba preokupasaun kbiit-laek sira, Amu Paroku ne'e dehan, iha situasaun agora Timor-oan hotu presiza lolo liman ba malu no tulun malu.

"Ita hotu preokupa ho situasaun ida ne’e, tan ne’e importante tebes parte hotu-hotu nia asaun solidaridade," dehan nia.

Kona-ba planu governu atu fó subsidiu $100 ba kada familia, Amu Thomas dehan, ida ne’e depende ba nesesidade kada familia.

"Karik ba familia ne’ebé (iha membru) barak liu hanoin katak $100 ne’e la to’o, maibé iha mós familia balun ne’ebé dala-ruma bele hetan de’it $40 mós naton ona ba sira atu hola foos saku ida," dehan nia.

Hatan kona-ba, fahe osan mak di'ak liu ka fahe foos, Amu Paroku ne'e dehan, osan ka foos laos kestaun importante, importante mak governu bele tulun komunidade sira, liu-liu sira ne'ebé laiha kbiit.

“Iha tempu ida ne’e ha’u labele dehan ida ne’ebé mak di'ak liu (osan ka foos-red) mais importante mak oinsá governu bele tulun nia povu kbit laek sira, maibé ninia mekanismu depende ba desizaun husi parte governu,” dehan Amu ne'e.

Iha fatin ketak, komunidade Suku Fuiloro, Postu Administrativu Lospalos, Antonio F. Hornai dehan, nu’udar sidadaun prontu atu koopera bainhira atu extende tan estadu emerjensia.

Maibé, nia dehan, governu presiza haree mós ba situasaun moris komunidade nian, liu-liu ba sira ne’ebé mak hela iha area rurais, tanba ho estadu emerjensia ne’e komunidade barak labele halo movimentu mai iha vila hodi faan sira-nia produtu.

“Hanesan negosiante lokal ne’ebé moris husi atividade faan produtu lokal, ami sente preokupa tebes, tanba ho situasaun emerjensia ida ne’e defisil tebes ba ami atu hetan rendimentu hodi sustenta ba nesesidade familia," nia hatete.

Antonio haktuir, presiza tebes governu fó subsidiu ba povu, liu-liu ba hirak ne’ebé nia vida moris depende ba atividade negosiu.

“Karik subsidiu ne’e atu osan ka sasan baziku ami simu de'it, importante sufisiente par ami bele uza hodi aguenta durante estadu emerjensia ida ne’e,” dehan Antonio.

 

Rate this item
(0 votes)
Last modified on Saturday, 25 April 2020 09:40
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.