“Ha'u sei uza ha’u-nia kna’ar nu’udar Prezidente atu buka meiu hodi apoiu edukasaun ba ema hotu. Tanba ha’u konsiente katak só edukasaun de’it mak bele muda ita-nia moris. Atu hadi’a ita-nia oan sira-nia futuru”, hatete nia hafoin halo kampaña loron daruak iha Postu Administrativu Laleia, Munisípiu Manatutu, kinta (03/03).
Nu’udar kandidatura Prezidente Repúblika, sei mai ho politika edukasaun nian katak oan ida nia oan matenek, muda nia-an, muda família no muda Nasaun.
Bainhira eleitu sai PR, maka sei aplika politika ne'e, liliu oinsá mak fó Bolsu Estudu ba kbi’it la'ek nia oan sira atubele asesu ba eskola ho di'ak.
Tanba atu realiza mehi ne'e, husu sidadaun hotu labele hili sala maibé hili mak kandidatu númeru 1.
“Ha'u husu atu ita labele hili tanba ita-nia líder favóritu, maibé hili haree ba saida mak nia halo ona ba povu ida ne’e iha tempu ukun-an”, esplika nia.
Iha tinan 4 tán, Timor-Leste sei kompleta ninia luta ukun rasik ba tinan 24 maibé preokupasaun barak mak nasaun ne'e sei hasoru hela, laiha solusaun.
Koordenadór Ekipa Vitória, Lauriano Fernandes husu inan aman sira atu hili inan ida hodi hadi'a filafali uma Repúblika Demokrátika Timor-Leste.
“Ba hau nia Feton no inan sira, Maun, Alin no tiu no avó sira mai ita hamutuk hili ita-nia Inan ba hodi hadi'a filafali ita-nia uma RDTL ne’ebé agora dadauk ita hotu preukupa ho situasaun ida agora, atu hadi’a buat sira ne’e hotu keta haluha iha loron 19 vota ba Númeru 1”, hatete nia. (*)