“Ami fó ami-nia apoiu tomak husi rai ulun to'o rai ikun, rai iha liman los, rai iha liman karuk, Os Verdes nia membru iha Timor laran tomak hamutuk 65 mill, iha elisaun ami kompremete katak sei lori 5 mill votu iha Likisá”, dehan nia iha kampaña Kandidatu Prezidente Repúblika, Lú Olo, iha Kampu Futebol, Likisá Vila, sesta (04/03).
Tanba FRETILIN hanesan sira-nia partidu, sira-nia aman nia partidu, sira hakarak hamutuk ho FRETILIN ne’ebé reprezenta lulik no rán, kulit no abut, reprezenta uma lisan, bee no ahi ne'ebé avo sira rezerva no fiar jeresaun ba jeresaun.
“Ida ne'e mak sai razaun fundamentu ida, ita mai hamutuk ho ita-nia partidu FRETILIN, segundu razaun ita fiar iha ita-nia aman kamarada Lú Olo, fiar ho ita-nia laran tomak, fiar ho ita-nia neon tomak, fiar tanba kamarada Lú Olo la hiit ema ida nia pasta”, afirma nia.
Os Verdes mós fiar tanba Lú Olo la sai kondutór ba ema ida hodi lori nia ba Prezidente Repúblika no fiar Lú Olo mak reprezenta duni rai ne'e nia na’in.
“Tanba rai na’in maubere, buibere nia na’in sira mak iha direitu liu atu kaer kna’ar Prezidente Repúblika Timor-Leste. Maubere nia oan mak tenke kaer rasik kuda talin, la bele kaer tali no ema mak kair fali kuda” hatete nia. (*)