“Ami Movimentu Potensiál Ermera (MEPE) sei servisu maka’as ho foinsa’e sira, inan aman no eleitór sira hodi lori vitória ba kandidatu Costancio Pinto ‘Terus’ ba ita-nia Prezidente Repúblika iha períodu 2022-2027”, dehan Portavoz MEPE, Fredio Fatima Soares, liuhusi konferénsia imprensa iha Munisípiu Dili, kuarta (09/03).
Nu’udar foinsa’e ne’ebé halibur-an iha Movimentu Potensiál Ermera (MPE) la sei husik le’et oportunidade sira bainhira akompañha prosesu politika husi ukun na’in sira no prosesu dezenvolvimentu ne’ebé la’o iha Timor-Leste durante restaurasaun independénsia tinan 20 nia laran.
Pozisaun Movimentu Potensiál Ermera (MEPE) deside sei fó votu ba Kandidatu Constáncio iha eleisaun loron 19 fulan-marsu tanba bazeia ba diskusaun no analiza kleán ba profil kada kandidatu sira-nia kapasidade istória luta ba independénsia, kapasidade akademiku no profesionál no esperensia ukun no pensamentu politika kandidatu sira-nian.
Ho ida ne'e, Movimentu Potensial Ermera hakarak deklara opiniaun politika balun mak, eleisaun prezidensiál tinan 2022 ne’e la hanesan solusaun ba situasaun krusiál hahú husi krize polítiku, no impase polítiku krize globál pandemia Covid-19 implika ba dezenvolvimentu nasionál.
“Atu rezolve situasaun hirak iha leten ami foinsa’e Movimentu Potensiál Ermera deklara apoiu kandidatu prezidente da repúblika ho númeru sorteiu 11 Dr. Constancio Pinto ‘Terus’ iha eleisaun prezidensiál 19 marsu 2022”, hatete nia.
Haree ba Kandidatu Terus nu’udar jerasaun lutadór ida hahú husi baze de apoiu iha ai-laran, klandestina iha vila laran, diplomásia iha diaspora, no hanesan mós embaixadór dahuluk Timor-Leste nian ba Estadu Unidu Amerika, ne’ebé iha esperiénsia ukun iha Governu, kapasidade intelektuál no akademiku, bele ko’alia lian Portugé, Inglés, Tetun no Melaiu.
“La’ós ne’e de’it, maibé kandidatu ne’e mós nu’udar jerasaun proklamadór RDTL nian no pesoál konfiansa maun Boot Xanana Gusmão nian hodi lidera frente klandestina no reprezentante CNRM iha frente diplomasia”, esplika nia.
Ho ida ne'e, MPE promete sei servisu maka’as hamutuk foinsa’e sira, inan-aman no eletór sira hodi lori vitória ba kandidatu Constancio Pinto ‘Terus’ hodi sai Prezidente Repúblika RDTL ba períodu 2022-2027. (*)
