“Ha’u hakarak apela hanesan segundu vise prezidente PLP ba Aileuoan sira no PLP iha munisípiu Aileu hateke Prezidente Lú Olo hanesan Prezidente ida ne’ebé pro-povu, tanba ida ne’e ba PLP oan sira keta haluha ita-nia kultura hatete, “han isin sikat ruin” tanba ida ne’e vota Lú Olo”, apela Demetrio Amaral, ba militante no simpatizante sira iha, Aileu, tersa (08/03).

Tanba ne’e, estrutura PLP iha obrigasaun morál hodi reafirma ba públiku katak tenke hatene no iha konsiénsia kona-ba ‘Hán isin sikat ruin”. 

“Ohin (8-marsu), ha’u hamrik iha fatin ida atu reafirma katak, Prezidente Lú Olo ne’ebé ukun tiha ona iha tinan lima, hatudu karater ida ne’ebé nu’udar Prezidente ideal ba Timor-Leste ohin loron”, afirma nia.

Tanba, Prezidente ida matenek maibé haraik-an, prezidente ida ne’ebé barani maibé prudente iha nia desizaun sira, Prezidente ida ne’ebé la halo desizaun arbiru, Prezidente ida ne’ebé la gasta tempu ba sira ne’ebé folin laek, Prezidente ida ne’ebé servisu ho nonok hodi hatudu rezultadu, Prezidente ida ne’ebé pro-povu.

“Ita-boot sıra hatene iha tempu Prezidente Lú Ola ninian mak lei sira importante ba ita-nia rai, hetan promulgasaun hahú husi Lei Kontra Korrupsaun, lei kona-ba seguransa sosiál promulga husi Prezidente Lú Olo”, informa nia.

Iha mós lei sira seluk ne’ebé ohin loron hatudu defeza ba povu Timor-Leste, hanesan lei aumenta pensaun ba idozu sira, lei bolsa da mãe, lei aumenta osan ba xefe suku no konsellu suku sira hotu, sira ne’e hotu tanba prezidente nia preferénsia pro-povu. (*)