“Hakarak kaer de'it prioridade ida hau-nia kandidatura, Prezidente repúblika nia kna'ar atu influénsia polítika públika, tanba ita hatene parte edukasaun responsabilidade Governu nian la'ós kna'ar diretamente Prezidente Repúblika nian, mais prezidente repúblika nu’udar Xefe Estadu nia kna'ar importante atu influénsia politika publika”, dehan nia hafoin halo palestra iha Institutu Universidade Maristas Baukau (IUMB), sábadu (12/03).

Maske kestaun edukasaun ne'e la'ós kna'ar Prezidente Repúblika nian, maibé nu’udar Xefe Estadu presiza influénsia Governu atu halo investimentu boot liu iha edukasaun ho kualidade.

Maibé atu dezenvolve edukasaun ne'e mak investe edukasaun ho kualidade nomós kestaun lian-tetun ho lian ofisiál portugéz.

Tanba hanesan ema hotu hatene katak kondisaun eskola privadu katólika sira ne'e investimentu di'ak liu eskola públika, tanba ne'e presiza dezenvolve infraestrutura, nomós presiza asegura katak eskola sira bele iha fasilidade ne’ebé naton ba estudante sira atu aprende.

"Primeiru laboratóriu sira, atu estudante sira bele aprende siénsia, biblioteka, ita hatene iha eskola kuaze hothotu laiha komputadór ho fasilidade ida ne'e. Segundu importante tebtebes atu dezenvolve lingua tetun, parte eskrita atu bele sai lingua instrusaun di'ak ho portugez”, hatete nia.

Parte seluk maka, Kandidata Milena Pires agradese tanba bele mai ko'alia iha Institutu Universidade Maristas Baukau (IUMB) nuudar Institutu Katóliku ba Formasaun Profesór sira nian, hodi ko'alia kona-ba tópiku ne'ebé importante loos ba nasaun.

"Aleinde naturalmente tanba ita iha períodu kampaña, ha'u sei dehan liafuan balun, mais importante ba ha’u ohin loron mak hetan oportunidade atu mai ko'alia ho ita kona-ba importánsia edukasaun nian”, afirma nia.

Maibé mudansa mak objetivu no rezultadu boot liu ne'ebé mak timoroan sira hakarak husi edukasaun, tanba tuir edukasaun mak foin bele impodera ema individuál, nomós ema polítiku, inklui impodera nasaun Timor-Leste.

Bainhira ema individuál mak hetan impoderamentu tuir edukasaun, no hetan impoderamentu koletivu tuir edukasaun, mak nasaun ne'e sei iha sosiedade ida ne'ebé poderoza, sosiedade ida ne'ebé bele deside nia futuru rasik.

“Ita hatene katak, desizaun hothotu ne'ebé ita halo, ne'e ita individuál, ne'e ita polítiku mak nu’udar nível nasionál tenke hetan duni benifísiu ba ema”, hatete nia. (*)