Diretór STAE Baukau, Lucio Freitas Salvador, hatete, fiskais balun husi kandidatura mai eziji fali karta kredensiál, maibé STAE Baukau laiha kompetensia.

"Lolos ita laiha problema, mais nia problema mak ita infrenta fali ho maluk sira fiskais husi kandidatura sira, tanba sira sempre eziji ita ho sira nia karta kredensiál ne'e, ita iha Munísipiu laiha kompeténsia atu produs karta kredensiál ba sira," dehan nia iha salaun apuramentu, segunda (14/03).

Nune’e, husu pontu fokál iha nasionál atu haree, tanba iha prosesu pakotementu, fiskais sira bele tuir de'it laiha nesesáriu atu kestiona kona-ba karta kredensiál.

"Ami rona informasaun husi nasionál, sira tuir prosesu pakotementu ne'e, sira bele tuir de'it, tanba laiha buat ruma sira kestiona iha ne'eba, atu pakote de'it matérial lori ba sentru de votasaun estasaun de votu, sira iha ona estasaun no sentru votasaun mak sira iha kredensiál, tanba sira sei reklama buat ruma iha ne'eba kona-ba prosesu, kontajen, aktas rezultadu nian sira bele halo reklamasaun protesta iha ne'eba, mais agora dadau ne'e, sira akomapaña de'it," nia argumenta

Pakotementu matérial siensetivu no non-siensetivu iha STAE Baukau, ba Postu Baguia no Baukau vila remata ona, entertantu tuir planu ba postu 4, Vemase, Venilale, Laga no Kelikai sei remata iha loron aban.

Enkuantu sentru votasaun iha Munísipiu Baukau hamutuk 125, estasaun votasaun iha 150, buletin votus 108.700 no totál eletores 96.207 mak sei partisipa iha votasaun ba eleisaun prezidénsial. (*)