“Sétimu governu, lei fundu minarai sai iha 2005, temi nune'e husi fundu minarai labele hasai nein dolar ida sein parlamentu aprova, mais komu sira mak halo lei, sira mak kondutór hotu, sira mak tonka malu hotu iha sétimu Governu 2017, Mari haruka hasai 70 juta dolar la liuhusi Parlamentu e Prezidente taka tiha nia matan, nia sei estuda hela de'it”, hatete nia iha kampaña eleitorál Kandidatu José Ramos Horta iha Tasitolu, tersa (15/03).
Iha Governu daualu mós Lei barak mosu aribiru de'it, no buat hotu ne'ebé di'ak muda hotu, no aprova mós programa rekuperasaun ekonomika iha rai laran liuhusi fahe Sesta Bázika, maibé to'o ohin loron seidauk hatene relatóriu kona-na ema na'in hira mak simu, no osan hira mak gasta.
Problema ne'e la'ós ida ne'e de'it maibé mós fundu Covid-19 tanba to'o agora ema hotu lahatene nia paradeiru.
Tanba durante ezekusaun fundu Covid-19 ne'e dala barak rona de'it mak Membru Governu sira la'o ba mai iha munisípiu hodi hetan perdiam, maibé lahatene ezekusaun Covid-19 ne'e la'o oinsá.
“Nune'e mós iha tinan haat de'it, orsamentu Estadu 7 millun la'ós juta, mais ita laharee nia rezultadu, e Prezidente taka matan tanba nia dehan yang penting ha’u-nia partidu tama halo Governu aitonka ba, hatama netik ha’u-nia kamarada sira iha Governu”, hatete nia.
Ho situasaun hirak ne'e, mak Partidu CNRT prefere hili kandidatura José Ramos Horta atu kurije hikas aktu sira ne'e, liliu ba hatuur hikas konstituisaun tuir nia dalan.
Partidu CNRT hili Ramos Horta, la'ós tanba gosta nia, no la'ós tanba nia iha buat ruma atu fó ba CNRT.
“Hanesan ama-apa sira, tiu-tia sira, avó feto, avó mane sira iha 1999 como milisia ameasa oho buka malu, sira la tauk ba hili opsaun ukun-an, hanesan ne'e mós iha dia 19 iha refendum daruak ba ita hotu atu salva nasaun”, hatete nia. (*)