“Atividade enseramentu formasaun Pro-Kultura ne'eb’e envolve materia Didétika, Pedagójika iha relasaun ho Infantujuvinil ne'ebé atu haburas literátura Pro-Kultura bele hamosu formasaun ne'ebé di'ak liuhusi formadór ne'ebé ensera sira formasaun”, dehan Prezidente INFORDEPE, Manuel Gomes de Araujo, iha salaun Sentru Kulturál Portugéz Embaixada Portugal, Kolmera-Dili, sesta (18/03).

Formandu sira tuir ona formasaun hodi habelar koñesimentu sira ne'e, Profesór sira aban bainrua sira mós bele fó formasaun ba lian Portugéz atu estudante sira bele komprende kona-ba literátura infantujuvinil Pro-Kultura ninian.

Formandu sira hamutuk na'in-106, mai husi Munisípiu 13, formandu na'in-53 selesionadu nu'udar efetivu remata ona sira-nia formasaun durante loron 10 ho oras 40 nia laran. Ba na'in-53 nu'udar suplente, sira ne'e sei tuir fali formasaun iha fula oin mai.

Formadór sira ne'e, sei koloka ba Postu Administrativu iha Munisípiu 13, ba kada formadór sei iha turma 2 no kada turma sei iha 20 ka 30 pesóal. Husi ne’e, formadór sira sei fó formasaun semana ida oras ualu sira iha turma rua siknifika formasaun semana rua oras sanulu resin-neen.

Formasaun ne'e, hahú iha loron segunda to'o kinta, loron sesta formadór koordena ho ekipa hodi prepara matéria ba semana oin.

Asistente Projetu Pro-Kultura, Claudia Golsalves hatete, atividade ne'e hanesan parte ida husi Projetu Pro-Kultura ninian ne'ebé finansia husi Uniaun Europeia no Dirije husi Instituto Camões Portugal.

“Objetivu prinsipal Projetu Pro-Kultura mak atu promove no empreviu rendimentu setór kulturál sira iha Timor no País Afrika ne'ebé ho lian ofisiál portugéz”, dehan nia.

Tanba ne’e, hanesan asaun pasifika ida husi kooperasaun bilateral entre Timor-Leste no Portugal liuhusi Projetu Pro-Kultura atu fó formasaun ba formadór lian portugéz.

Reprezentante Formadór, José Luis Mendonça, husi Munisípiu Ermera hatete, formasaun ne'e atu kapasita fali formadór sira hotu atu dezenvolve ba labarik ho otas ki'ik katégoria ba Infantojuvinil.

“Formasaun ne'e, bele dezenvolve liután formadór sira atu hala'o prátika poesia no litératura ne'ebe relasiona ho infantojuvinil. Formasaun ida ne'e, faze daruak nian no iha faze dahuluk ami tuir formasaun kona-ba Pro-Portugues. Iha faze daruak nian, formasaun kona-ba Litératura Infantojuvinil”, dehan nia.

Iha difikuldade ne’ebé formadór sira hasoru mak livru sira maibé dadaun ne'e autór barak mak ko’alia ona kona-ba literatura no bele halo mini peskiza ka asesu liuhusi mídia sosiál (Google).

“Ba oin ami sei dezenvolve ba área rurál no vulnerável sira tanba iha Timor-Leste litératura infantojuvinil seidauk kobre to'o aréa rurál sira”, afirma nia. (*)