"Ha’u agradese ba konfiansa ne'ebé imi haraik mai ha’u liuhusi imi-nia votu sira. Maibé hanesan ita hotu haree katak imi-nia votu sira ne’e la natoon atu lori ha’u ba Aitarak-laran. Eleitór timoroan barak sei iha preferénsia kandidatu seluk. Ita hotu kongratula sira ba sira-nia vitória, no hein katak kandidatu ne'ebé manán ne’e sei lori duni Timor-Leste ba oin”, dehan kandiatu Lamukan, iha pájina ofisiál Gill Bolale ne'ebé www.tempotimor.com asesu, tersa (22/03).
Tanba ne’e, enkoraza nafatin eleitór sira atu kontinua partisipa iha votasaun volta daruak nian, hodi hili kandidatu prezidente repúblika ne'ebé fiar sei reprezenta povu nia aspirasaun politika.
Nune'e hakarak sauda no kongratula povo Timor-Leste tomak ba eleisaun ida ne'ebé, em jerál pasifiku no ordenadu, maske iha fatin balun, liliu sentru votasaun paralelu sira Dili, mosu dezentendimentu ne'ebé ikusmai halo sidadaun lubun labele ezerse sira-nia direitu.
Ba situasaun pasifiku no ordenadu iha teritoriu tomak hatudu povo tomak nia konsiensia katak ambiente dame ne’e hanesan kondisaun importante atu ezerse sira-nia direitu ba vota.
“Ha’u atu sauda apoiante sira hotu ne’ebé durante fulan ida nia laran ne’e voluntariamente hala’o servisu hodi prepara komisiu sira no hatutan hanoin sira ne'ebé sai hanesan motivu no objetivu ba ha’u-nia kandidatura. Ha’u agradese mós ba inan-feton no maun-alin sira ne’ebé simu ha’u no ekipa ho resepsaun ida hanesan ema uma laran rasik duni. Ba inan-aman, maun-alin, no feton sira iha fatin sira ne’ebé ami la konsegue hakat ba, ha’u husu deskulpa, tanbá ida ne’e mai husi limitasaun tempu badak ne'ebé la permiti ami atu to’o iha fatin hothotu”, esplika nia. (*)