Prezidente Interinu Konsellu imprensa (KI), Expedito dia Ximenes, fó sai katak, Rezultadu Monitorizasaun ba atividade kobertura ka reportajen média durante kampaña eleitorál loron 14, no naliza kona-ba produtu jornalistiku iha meiu komunikasaun sosiál, laiha balasun ba públikasaun.
“KI hatudu rezultadu monitorizasaun iha kampaña polítika no votasaun, Jornálista sira halo kobertura no publikasaun notísia, programa no reportajen direta (live streaming) meiu komunikasaun sosiál iha períodu kampaña politika Ia fó biban balansu ba kandidatu hothotu, maibé barak-liu foka de’it ba figura boot sira no kandidatu sira ne'ebé hetan apoiu husi partidu politku sira”, informa Expedito dia Ximenes, iha salaun enkontru KI, Kintal Boot, sesta (25/03).
Ba rezultadu monitorizasaun ba reportajen mídia iha tempu kampaña eleisaun prezidensiál, kuaze semana rua resin iha periddu kampaña politika, Konsellu imprensa halo monitorizasaun no halo análize ba produtu jornalistiku meiu komunikasaun sosiál sira-nian iha kontestu kobertura no publikasaun bazeia ba Lei Komunikasaun Sosiál, Kódigu Etika Jornalistika no prinsípiu jornalizmu universal.
Iha ne’e, Konsellu Imorensa halo monitorizasaun ba aktu no atitude jornalista sira-nian iha mídia sosiál bazeia ba matadalan mídia sosiál ba Jornalizmu no Matadalan Reportajen Eleitorál ba Jornalista no Meiu Komunikasaun Sosiál.
Nune’e, konsidera notísia balun sai sensasionál no provokativu ne'ebé Ia kontribui ba paz no estabilidade iha railaran tanba nakunu ho opiniaun jornalista ka editór nian, konsidera hanesan propaganda politika iha períddu eleisaun prezidensiál nian.
“KI mós hetan ka identifika notísia no meiu komunikasaun sosiál nian balun ne'ebé la sensivel jéneru tuir papél jéneru nian iha kontratu kobertura no públika relasiona ho loron votasaun”, hatete nia.
Konsellu Imprensa nu'udar instituisaun Independente Estadu nian ne'ebé hala'o nia kna’ar importante sira tuir Lei Komunikasaun Sosiál, Artigu 44 atu garante liberdade imprensa no liberdade espresaun iha pais ne'e.
Iha ámbitu eleisaun prezidensiál 2022, KI kontinua ezerse ninia mandatu hodi garante no asegura implementasaun Kódigu Etika jornalistika iha kontestu kobertura no publikasaun programa sira meiu komunikasaun sosiál nian hodi kontribui ba direitu públiku nian atu asesu informasaun loloos no kredivel hodi sidadaun sira bele ezerse sira-nia direitu votu iha loron votasaun.
“Konsellu imprensa hato'o apresiasaun ba meiu komunikasaun sosiál sira no jornalista hothotu, tantu mídia imprime, online no mídia eletronika nia kontribuisaun no servisu tomak iha períodu pra-kompaña politika, kampaña politika to’o loron votasaun”, agradese nia.
Maske ho limitasaun oioin iha kontestu kobertura nian, maibé nafatin públika notísia no programa importante no relevante sira hodi hakunu públiku nia direitu atu asesu informasaun. (*)
