“Militantes ha'u la ko'alia, mais sira ne'ebé kuadra mak la apoiu, ami bele distitui no suspende sira, ne'e ha'u-nia pozisaun nu'udar Prezidente Partidu Libertasaun Populár (PLP)”, dehan Prezidente PLP, Taur Matan Ruak, iha nia rezidensia Metiaut, sesta (01/04).

Maske nune'e, Prezidente PLP fiar militante no apoiante PLP rasik hothotu sei vota ba kandidatura prezidente Repúblika, Francisco Guterres ‘Lú Olo’, iha loron 19 abaril 2022.

"Ha'u fiar katak, husi partidu PLP hothotu sei apoia”, dehan nia.

Iha Primeiru volta PLP la apoiu kandidatu ida de’it no desizaun fó liberdade ba militante sira atu vota konsiénsia, maibé iha segunda volta desizaun Partidu nia apoiu kandidatu husi FRETILIN.

“Sim, la apoiu iha primeiru Volta ba FRETILIN ne'e tanba iha kestaun rua, primeiru, imposivel nia sei manán iha primeiru ronde se kandidata barak, segundu imposivel ha'u-nia partidu (PLP) apoiu kandidatu ida, kuandu ha’u-nia kaben mós, nia avansa”, esplika nia. (*)