“Ha'u koiñese Prezidente Kim Dae-Jung di'ak loos ho nia kolega sira hothotu iha Korea Súl, ha'u hahú ko'alia ho sira para simu traballadór Timorense. Primeiru grupu ke ba ki'ikoan loos la to'o 50 pesoál, ha'u rasik ba despedida sira iha Aeroportu, e kontinua halo loby neneik, númeru ne'e aumenta e aumenta. Austrália mós nune'e, ha'u mak hahú, nu’udar Prezidente ko'alia ho Primeiru Ministru Jhon Howard ho Ministru Alexander Downer para loke odamatan Austrália nian ba ita-nia joven sira bele ba servisu iha ne'eba”, dehan Horta liuhusi konferénsia imprensa iha Lamegua, Baukau Vila Antiga, domingu (10/04).

Ba obra ida ne'e, ko'alia bebeik ona na traballadór sira iha liur, bainhira nia sai nu’udar Ministru Negósiu Estranjeiru no Kooperasaun, iha 2003, nia mak ko'alia ho Prezidente Korea Súl tanba sira iha relasaun metin.

"La'ós ema seluk, tanba ha'u mak relasaun metin uluk ho Prezidente Matebian Kim Dae-Jung, ne'ebe simu premiu Nobel da Pas”, hatete nia.

Tanba iha momentu ne'eba, propoin premiu Nobel da Pas ba Prezidente Korea Súl, Kim Dae-Jung mós nia mak halo, tanba ne'e sira relasaun di'ak loos hodi hahú ko'alia ho sira para simu traballador Timorense”, deklara nia.

Aleinde ba fali Austrália, iha tinan 2007 kuandu sai Prezidente Repúblika ko'alia kedas ho Primeiru Ministru Austrália nian, Jhon Howard no Ministru Alexander Downer atu loke odamatan Austrália joven timoroan sira bele ba servisu iha ne'eba.

“Ne'e la'ós fasil, lori tinan lubuk ida, primeiru grupu ki'inoan ida ba Pers, sira 13 de'it tinan lubuk ida iha ne'eba e ha'u ba haree sira, iha partilla ba Austrália”, afirma nia.

Bainhira asume kna’ar nu’udar Ministru Negósiu Estranjeiru no Kooperasaun, Horta rasik ba ingleterra, simu omenajen iha sidade ida naran Offshore iha 2015 tanba uluk ba fulan lubuk ida estuda iha ne'eba.

“Ha'u ba ne'ebá hasoru timoroan lubuk ida ne'ebé servisu iha Offshore iha inglaterra-Irlándia”, dehan nia.

Tanba rai rua hanesan Irlándia ho Inglaterra simu traballadór husi nasaun barak, ne'ebé ba ne'eba, buka moris ho dignidade, balun aprende estuda liután, balun sai boot, tanba ne'e bainhira timoroan ba ne'eba, lideransa sira sempre fó apoia maka’as.

Bainhira eletu ba prezidente repúblika, sei haree ko’alia didi'ak ho Governu Inglés hodi nomeia embaixadór ida iha kapasidade no matenek atubele halo instrusaun orientasaun Prezidente Repúblika ho Governu oinsá mak bele haree fó protesaun diplomátiku konsulár ba timoroan sira iha Inglaterra-Irlánda.

"E haree ho Governu Inglatera oinsá bele fasilita liután timoroan sira ba servisu iha ne'eba”, esplika nia.

Purtantu Prezidente Repúblika mós sei hahú diálogu ho Governu Alemaña tanba kontaktu informál ho Alemaña dadaun la'o tiha ona, tanba nia amigu di'ak ho Governu Alemaña.

“Tanba Governu foun iha Alemaña ne'e ha'u koiñese, sira konvida ha'u ba serimónia Pose iha 8 de dezembru tinan kotuk ne'e, ha'u labele ba tanba primeiru ha'u difísil hetan aviaun ba no fila, segundu iha 8 dezembru ne'e mós hau halo diskursu boot ida e abertura ba sarani Katólika timorense, ne'e duni ha’u la ba Alemaña”, afirma nia.

Maibé, Horta promete ona ba Governu Alemaña, katak bainhira eleisaun Prezidente Repúblika 2022 ne'e remata no hetan ona pose mak nia sei ba iha Alemaña tanba hakarak haree oinsá Alemaña bele simu traballadár timoroan.

“Sei haree mos enkontru ho japaun, Timor sei tama iha lista traballador ke japaun simu,"dehan nia.

Prezidente Partidu Demokrátiku (PD), Mariano ‘Assanami’ Sabino hato'o apresiasaun no parabéns ba trabaladór timoroan liliu husi Munisípiu Lautein ne'ebé sai eroi kontinuadór atu kontribui taxa ba Estadu.

Tanba durante ne'e timoroan barak la'o ba buka servisu iha Inglaterra no Irlánda, inklui Austrália no Korea Súl hodi haruka osan hadi'a nesesidade família iha Timor-Leste.

“Imi mak eroi kontinuadór ne'ebé tanba servisu iha ne'e laiha, imi ba buka servisu para ajuda imi-nia alin sira, ajuda inan-aman sira halo uma mutin iha fatin-fatin ne'e tanba imi-nia servisu”, dehan Asanami. (*)