Ékipa responsavél Sekretáriadu Tékniku Administrasaun Eleitórál (STAE) Munisípiu Baukau, hahú tabulasaun ba rezultadu apuramentu Munisípal husi tuku 06:38 iha loron 19 fulan-abril tinan-2022 (horseik) loraik, no remata apuramentu nivél Munisípal iha loron 20 fulan-abril tinan-2022 (ohin) pur-volta tuku 3:00 mardugada.

Durante ékipa STAE Baukau halo tabulasaun ba akta 125 iha apuramentu Munisípal, rezultadu tabulasaun ne'ebé www.tempotimor.com asesu, tuir dadus totál eleitóres iha Munísipiu Baukau, ne'ebé STAE Baukau rejista atu tuir votasaun hamutuk 96.207, vota iha sentru votasaun paralelu hamutuk -533 totál votante hamutuk 95.708.

Eleitór ne'ebé partisipa iha votasaun hamutuk 69.952 ho taxa partisipasaun pursentu 73.09.

Votu abandonadu 9 ho pursentu 0.01, votu nulu 542 ho pursentu 0.75, votu branku 191 ho pursentu 0.27, votu reklamadu 25 ho pursentu 0.04.

Husi apuramentu Munisípal, hetan rezultadu finál,  kandidatura Prezidente Repúblika ho númeru sorteiu 2, Francisco Guterres Lú Olo hetan pursentu 66.45 husi votantes 45.985, enkuantu kandidatu númeru sorteiu 1, José Ramos Horta hetan pursentu 33.55 husi votantes 23.217.

Durante apuramentu Munisípal, hetan observasaun husi observadór internasionál União Europeia, Ofisiál Supervizaun husi CNE Baukau, Brigada husi STAE Munísipiu no Fiskais husi kandidatura iha Baukau, hetan mós segúransa masimu husi PNTL Baukau.

Entertantu Munísipiu Baukau kompostu husi Postu Adminisitrativu-6 hanesan, Baukau Vila, Baguia, Laga, Kelikai, Venilale no Vemase, ne’ebé sentru votasaun hamutuk 125 ho estasaun votasaun hamutuk 150. (*)