“Tanba saida?. tauk keta la promulga ka, se hothotu iha interese, Prezidente ne'ebé mai mós haree katak iha nesesidade, nia sei promulga, nusa mak ita tenke halo buat ida hanesan luflafur derepente de'it kalan mehi ohin dader halo ona retifikativu”, dehan Xefe Bankada CNRT, Duarte Nunes, iha reuaniaun plenáriu estraordináriu iha PN, sesta (29/04).

Ba proposta retifikativu ne'e rasik to'o agora CNRT rasik seidauk kompriende, tanba pedidu karater urjénsia ba proposta ne'e rasik sira seidauk lee maibé hetan ona apresiasaun iha reuniaun komisaun.

Bankada CNRT haree katak, proposta retifikativu ida ne'e tuir loloos fulan neen mak bele aprezenta tanba ezekusaun OJE 2022 to'o agora foin atinje pursentu 16.

Maibé nesesidade balun ne'ebé sai prioridade ba Governu atu implementa, entaun tenke halo debate ho normál atu Parlamentu Nasionál haree no diskute didi’ak oinsá mak bele responde duni ba preokupasaun Governu.

“Ha'u-nia pergunta mak ne'e, sé problema ne'e ko’alia kona-ba sosiu ekonomiku ne'ebé ita hasoru iha rai laran, pois provokadu husi funu ne'ebé iha, pandemia ne'ebé naruk, nusa mak ita la halo diskusaun normal para ita haree tok ita aloka osan. Osan ne'ebé foin mak ezekuta 16 pursentu”, hatete nia.

Ba kestaun ne'e, Ministru Finansas (MF), Rui Augosto Gomes hatete, pozisaun Governu husu pedidu ho karater urjénsia ne'e tanba haree ba situasaun ekonómika mundiál ne'ebé nia detereorasaun hahú sa'e maka’as.

“Pergunta kona-ba tanbasá mak urjente loos, hanesan ohin ha’u temi katak situasaun ekonomika mundiál ne'e nia detereorasaun ne'e maka’as la halimar”, dehan nia.

Hanesan ezemplu, iha Europa dadaun ne'e enfrenta hela kalamidade boot ba mina no gas, tanba Rusia la halo esportasaun. Tanba ne'e hatudu isu siknifikante katak sei iha pezu boot tebtebes ba orsamentu sira ne'ebé Estadu nian iha nasaun sira Europa no nia impaktu multiplikadór ne'e sei sa'e maka’as.

Iha Timor-Leste mós enfrenta hela substansiál inflansaun sa'e ba pursrntu 6,7 ne'ebé nia tendésia ne'e sei sa'e maka’as hodi afeta ba família no individu sira.

Dadaun, iha Munisípiu Dili atinje ona purdentu 7, kuandu permanese maka’as liu, sei nakfilak ba inflasaun, no bainhira mosu ida ne'e, mak Governu sei difísil atu kontrola, tanba sei laiha solusaun iha parte oferta nian.

Tanba ne'e, intervensaun orsamentu retifikativu ne’ebé aprezenta ba Parlamentu Nasionál ne’ebé mosu ho karater urjente loos.

Maibé ba kestaun taxa ezekusaun OJE 2022 ne'ebé dehan atinje pursentu 16, Governu hakarak klarifika de'it katak to'o ohin loron sesta (29/04), taxa ezekusaun orsamentál real dadaun atinje pursentu 25 tiha ona, tanba iha ne'eba taxa ezekusaun ba kompromisu atinje ona millaun $690 no obrigasaun sira atinje millaun $100.

“Agora kompromisu no obirgasaun sira ne'e bazeia ba programa sira ne'ebé aprova tiha ona e ida ne'e programa sira ne'ebé ita lakohi bok para labele halo alterasaun hanesan ita halo iha tinan kotuk (2021)”, esplika nia. (*)