Iha loron 11 maiu, Parlamentu Nasionál deside aprova Proposta Orsamentu Retifikativu iha finál globál hodi aprezenta kedas ba Prezidente Republika atu estuda molok deside promulgasaun ka veta.

Tuir informasaun ne’ebé www.tempotimor.com asesu kuarta (17/5) katak, lei orsamentu retifikativu tinan 2022 nian, dadaun ne'e hetan ona promulgasaun husi Prezidente Repúblika.

Ho lei orsamentu retifikativu ne'e Governu aprezenta ho montante billaun $1,129 maibé durante diskusaun espesialidade deputadu sira aprezenta tan proposta adisionál kuaze millaun $100-resin, nune’e proposta OR aumenta ba billaun $1.241.

Ho aprovasaun OJE Retifikativu 2022 ne’e, lori mudansa iha dotasaun orsamentál, hanesan, Reseita Globál Konsolidada sa’e ba $3,348,070.979 no despesa globál konsolidada $3,347,457.179.

Orsamentu Órgaun no Servisus Administrasaun Sentrál hetan aumentu $1,241,210.747 no ninia totál agora sa’e ba $3,100,688.695, ne’ebé fahe tuir kategoria klasifikasaun ekonómiku hanesan Transférensia Públika ho montante $1,950,982.687; Bens no Servisu ho montante $467,077.382; Kapitál Dezenvolvimentu $390,177.399, Saláriu no Vensimentu $250,537.130; no Kapitál Menór s$41,914.097.

Orsamentu Retifikativu ne’e mai ho medida 13 mak hanesan Atribuisaun osan fulan da-13 ba kada família (eseptu funsionáriu públiku sira; Projetu Uma Kbiit Laek Plus, Bolsu Estudu ba Mellór Graduadu Estudante, Kriasaun Fundu Veteranu, Programa Maundobra ba Postu Administrativu (PEMOPA), Hari’i Sede ba Arte Marsiál no Rituál, Programa Eskola iha uma (home schooling).

Alende Oferese internet gratuitu ba eskola sira hahú husi Eskola Infantil to’o Ensinu Superior, Buka Empregu ba mellór alunu universitáriu sira, Estabelesimentu Sekretária ba Asuntu Traballadór Esteriór no Komunidade Timoroan iha Diáspora, Revitaliza kafé no subsídiu ba kafé Laku-teen, Subsídiu akomodasaun ba PNTL no F-FDTL, Pagamentu renumerasaun PNTL nian ho rejime salariál foun. (*)