“Objetivu husi proposta ne’e atu garante valór mínimu pensaun invalidés no ferik-katuas, iha ámbitu rejime kontributivu seguransa sosiál nian, bazeia ba karreira kontributiva traballadór sira nian”, dehan Ministru Prezidénsia Konsellu Ministru (MPKM), Fidelis Manuel Leite Magalhães, iha Palásiu Governu, kuarta (25/05).

Nune’e, atu garante pensaun sira ne’e, husi rejime kontributivu, nunka sei iha valór ida-ne’ebé ki’ik duké pensaun sosiál sira, hodi nune’e bele valoriza esforsu kontributivu traballadór sira-nian.

Aleinde ne'e Governu aprova mós projetu dekretu lei ne'ebé aprezenta mós husi Vise-Primeira-Ministra no Ministra Solidariedade Sosiál no Inkluzaun, kona-ba aprova pensaun sosiál.

“Prestasaun sosiál foun, ne’ebé kria husi diploma ida-ne’e, ho karater pensaun sosiál ida no la’ós subsídiu”, hatete nia.

Ba ida-ne’e atu asegura rendimentu ida mínimu ne’ebé dignu ba ema hotu ne’ebé presiza liu, tanba laiha rendimentu seluk no iha situasaun ferik-katuas ka invalidés.

Pensaun sosiál ida-ne’e sei substitui Subsídiu Apoiu ba Ferik-Katuas no Inválidu sira (SAII), hodi halo sistema seguransa sosiál sai justu liután.

“Ho alterasaun lejizlativa ida-ne’e pretende alterasaun sira tuirmai mak,  Muda konseitu, husi subsídiu ba pensaun sosiál, Altera ámbitu pesoál hodi inklui traballadór sira ne’ebé inklui iha sistema kontributivu, maske laiha direitu ba pensaun, ajusta valór prestasaun nian, hodi garante katak valór pensaun nian la ki’ik liu duké limite liña pobreza internasionál nian,  la permite akumulasaun ho rendimentu seluk ba benefisiáriu foun, altera periodu ba pagamentu sira, husi pagamentu semestrál ba pagamentu mensal”, afirma nia. (*)