Tanba, eis-traballadór kontinua mai ejize sira-nia problema no Parlamentu Nasionál mós hasai ona rezolusaun númeru 5 iha loron 03 fulan-fevereiru atu governu rezolve sira nia direitu.
"Eis-traballadór sira Kompañia Lorosa'e nian, ne'ebé Parlamentu Nasionál rasik hasai tiha ona rezolusaun ida husu governu atu halo pagamentu ba direitu traballadór sira ne'e, maibé to’o horseik (13/06), sira nafatin mai hasoru deputadu sira, husu sira nia direitu, la hatene prosesu to’o iha ne'ebé ona" nia levanta iha Parlamentu Nasional, tersa (14/06).
Nia komfirma, prosesu implementasaun ba rezolusaun ne’e, to’o iha ne’ebé ona, tanba momentu aprova rezolusaun ne’e, atual Ministru Obras Públikas, Abel Pires mós sei deputadu husi bankada PLP.
“Ha'u hanoin Governu haree didiak atu labele halo tratamentu ba direitu ita nia povu nian hanesan ne'e”, nia husu
Tanba, rezolusaun ne’e, aprova husi maioria Bankada Governu nian, maibé governu la tau konsiderasaun to’o agora.
Antes ne’e, eis-ministru Obrás Públika, Salvador Pires hatete, problema ba traballadór seguransa lorosa’e, ne’ebé antes ne’e fó seguransa ba Sentrál Elétrika Hera no Betano inklui sub-estasaun sira ne’e, responsablidade kompaña nian, la’os governu.
“Seguransa Lorosa’e nia kontratu remata ona, ami loke tender sira mak lakohi tuir, Governu hatene kontratu ho kompaña, agora kompaña ho traballadór. Iha duni loke tender, maibé sira la mai tuir, sira hakarak estensaun de’it, sira nia kontratu ne’e komesa iha 2011 to’o 2019, iha ha’u nia mandatu”, deha nia
Tinan 2015, iha ona rekomendasaun husi Tribunál das Kontas atu kontratu sira ne’ebé estende-estende ne’e, tenki halo ona konkursu.
“Ami momentu ne’ebá halo konkursu infelizmente Seguransa Lorosa’e hanesan kompaña la ba tuir, podia nia ba tuir, tanba nia mak esperente liu”, nia afirma
Nia akresenta, momentu ne’ebá iha limitasaun orsamentu, entaun desidi diminua númeru seguransa iha sub-estasaun no konkursu ne’e, kompaña Guardamor mak sai manán na’in, nune’e Guardamor ba ko’alia ho traballadór (Seguransa Lorosa’e) atu troka farda de’it, maibé sira labele akomoda hotu, tanba númeru ki’ik, la hanesan ho uluk.
Nune’e, to’o ohin loron situasaun ne’e, sai preokupasaun ba ema hotu, maibé problema ne’e responsablidade kompaña Seguransa Lorosa’e nian, tanba kompaña mak emprega traballadór. (*)