Tuir informasaun ne’ebé www.tempotimor.com asesu iha pájina MAE, kinta (16/06) katak, Ministru Administrasaun Estatal (MAE), Miguel Pereira de Carvalho hatete, nia parte simu ona pedidu husi komunidade sira, atu kria suku iha Sentru Mulia-Uaiaka.

Tanba komunidade sira haruka ona ba Ministériu no persuaveza haruka ona mai estuda preleminar ida kona-ba situasaun terenu levantamentu kona-ba informasaun sosiál, polítika sira iha ne'e kona-ba asuntu rai sira no seluk tan.

Maibé sei presiza halo estudu iha tempu tuir mai wainhira konklui estudu sira mak Ministériu Administrasaun Estatal bele foti desizaun.

“Ohin ha’u rai hela mensajen rua ba ita-nia komunidade sira iha área Sentru ida ne 'e liliu iha Sentru Uaiaka katak kolabora ho téknika sira husi MAE atu kompleta informasaun, tékniku sira ne'e importante tebes”, informa Ministru Miguel ba komunidade sira foin lalais ne’e.

Ba pedidu husi komunidade sira desizaun politika ne'ebé foti tenke bazeia ba informasaun tékniku sira-nian.

“Ha’u mós apela ba populasaun sira ne'ebé hela iha área ida ne'e para promove diskusaun la’ós entre sira ho sira maibé sira ho viziñu sira, wainhira ita forma suku ida-ne'e portantu iha nia impaktu ba mudansa estrutura suku ne'e bolu naran suku prinsipál ho suku foun e mós impaktu teritóriu ho suku viziñu sira, promove diskusaun sira hanesan ne'e para aban bainrua Governu foti desizaun karik afavor atu nune'e labele kria problema iha populsaun sira nia le'et. Husu atu kria nafatin relasaun di’ak ho viziñu sira”, dehan nia.

Maske populasaun sira mós hato'o ona sira-nia ejizénsia no hato' o informasaun hodi bele konsidera, maibé ministériu mós sei kontinua halo levantamento tékniku ho populsaun sira iha nomós ho viñu sira tanba área ida-ne'e ligasaun ho Postu Administrativu Kelika no Postu Administrativu Laga. (*)