“Sim, saida mak hanoin ita-boot nia pergunta ne'e pertinente tebes katak loos ha'u mós hasoru-malu ho Prezidente Autoridade RAEOA, ami ko'alia no dada-lia oituan halo nusa mak bele iha biro televizaun ka Rádiu ida iha Oekussi, atubele fó sai produsaun notísia nomós dezenvolvimentu ne'ebé mak la'o iha Oekussi ba mós munisípiu seluk ne'ebé mak oras ne'e iha rai-boot iha ne'ebá liliu Munisípiu 13”, dehan nia hafoin atende entrevista husi Rádiu Komunidade Atoni Liafau, iha Santa-Rossa, Oekussi, tersa (19/07).
Tanba dezenvolvimentu ne'ebé mak la'o iha Oekussi maka’as tebtebes bainhira kompara ho Munisípiu seluk tanba MAPKOMS hanoin presiza projeta referénsia hirak iha futuru atu hothotu koiñese Oekussi ne'e nia la'o halo nusa.
“Nune'e sai referénsia mós ba Munisípiu seluk, hodi dezenvolve mós sira-nia suku iha Munisípiu tuir esperiénsia ne'ebé mak Oekussi halo”, afirma nia.
Maibé ba Preokupasaun ida-ne'e MAPKOMS hanoin hela iha tinan ida-ne'e bele hatama ona iha planu atu haree sé posibilidade Parlamentu Nasionál atu aprova orsamentu ida-né'e mak tinan-oin bele haree oinsá mak hari’i biro ida iha Oekussi ne'ebé sei koopera ho RTTL no Tatoli tanba ajénsia rua ne'e ajénsia estatál.
“Entaun hanesan Governu iha obrigasaun atu fó apoiu ba sira para sira hari’i rasik Biro ne'e, iha-ne'e bele sai fontes informasaun ne'ebé mak kreadivel husi estadu ninian iha Oekussi”, deklara nia. (*)