Vise Xefe Bankada CNRT, Patrocínio Fernandes, sujere ba Governu atu normaliza folin mina iha merkadu nasionál liuhusi apoiu subsídiu ba kompaña importadór ne'ebé durante ne’e hatama mina mai Timor-Leste.

“Hanoin Governu haree took didi’ak ida-ne’e no tuir ha’u-nia hanoin Governu nia intervensaun ne’e ba kompaña sira-ne’ebé mak suplay mina mai Timor-Leste, hodi bele normaliza folin ne’e iha merkadu. Nune’e ema hothotu, ki’ikoan ka boot, bele asesu ba folin mina ne’e”, dehan nia iha Plenária Komisaun Permanente iha Parlamentu Nasionál, tersa (16/08).

Maske dadauk Governu hasai ona rezolusaun ida atu fó subsídiu ba transporte públiku maibé ne'e la'ós nesesáriu atu responde ba folin mina iha Timor-Leste.

“La’ós fó fali susbsídiu ba transporte públiku, depois povu baibain nafatin difikulta sira labele asesu ba mina. Loloos Governu fó se folin sa’e oituan $0,80 sentavu entaun Governu foti $0,80 sentavu nia ka’er kada livru fó subsídiu ba kompaña tolu ne’ebé mak hatama mina mai, nune’e nia folin ne’e bele normaliza iha merkadu”, esplika nia.

Deputadu Bankada Frente Revolusionariu Timor-Leste no Independente (FRETILIN), Marito Mota, apoia ideia ne'ebé fó sai husi deputadu CNRT hodi husu Governu apoiu Kompaña Importadór mina nune'e bele reduz folin mina iha Timor-Leste.

“Ha'u sekunda ho ideia ne’e liga ba subsídiu mina nian katak tuir loloos Governu halo intervensaun ba kompaña tolu ne’ebé hatama mina husi li’ur mai, atu nune’e Timor-Leste bele asesu mina ho folin ne’ebé baratu duké ba de’it ba transporte públiku sira”, hatete nia.

Ba kestaun ne'e, Vise Prezidente Parlamentu Nasionál, Maria Angelina Sarmento hatete, preokupasaun ne'ebé deputadu sira levanta, parte tékniku sira husi Ministériu Asuntu Parlamentár no Komunikasaun Sosiál (MAPKOMS) rejista hela no sei hato'o ba Governu atu fó resposta iha tempu tuir mai. (*)