“Vizibilidade Timor ninian, katak Timor-Leste maske foin, ita sempre uza dehan nasaun ne’ebé mak hetan ukun-an ikus liu nasaun sira seluk iha Ázia, iha Sudueste Aziátiku, maibé hahú hatudu ninia prezensa, ninia vizibilidade iha rejiaun ida-ne’e”, dehan Prezidente KI, Virgílio da Silva Guterres, iha Salaun CNE, Kaikoli, kinta (25/08).
Forum diálogu ida-ne’e sai mós eventu Internasonál ida ne’ebé KI halo hahú kedan husi tinan 2017 no eventu anual ida-ne’e, baibain realiza iha loron 10 maiu, koinside ho aniversáriu KI ninian.
Tanba orgaun reguladór Konselu Imprensa ne'e mosu iha 2016, no servisu hamutuk ho órgaun ka plataforma rejionál sira hanesan PER iha Comunidade dos Paises de Lingua Portuguêsa (CPLP), no iha Sudeste Aziátiku.
Orgaun Komunikasaun Sosiál iha Timor-Leste ninia kredivel ne’e maka’as liután, tanba KI sai ko-fundadór ba estabelesimentu Rede Konsellu Imprénsa Sudeste Aziátiku nian, ka “Southeats Asia Press Councel Net Wrok”.
Dadauk rede Konsellu Imprensa Sudueste Aziátiku ida-ne’e, lidera husi Indonézia no loloos ba ona Mianmar, maibé tanba sira iha problema ba mudansa politika iha laran, entaun Indonézia mak sei lidera.
Tanba ne'e, eventu “The Dili Dialogue Forum” ida-ne’e nia prinsipiu ida mak atu vizibiliza prezensa Timor-Leste nian iha rejiaun Sudueste Aziátiku, liliu nafatin fahe esperiénsia iha aspetu mídia nian.
“Ida-ne’e mak esénsia hosi forum ida ne’e. Forum ida-ne’e, alende atu diskute esperiénsia, fahe esperiénsia, ida mós ba Timor atu vizibiliza ninia-an, liliu iha aspetu mídia ninian”, esplika nia.
Tuir dadus Reporter sein Fronteira ne'ebé Prezidente Repúblika rasik mós ko'alia ona katak index Liberdade imprénsa Timor-Leste nian ne’ebé uluk 71, maibé iha tinan 2022 konsege tun ba 17.
Ba rezultadu ida-ne'e mak KI sei kontinua buka oinsá organiza eventu sira ne’e atu mantein, nune’e bele fó mensajen ba politiku sira no ba ema sira ne’ebé mak dala-ruma konsidera mídia ne’e sai hanesan obstakulu ba sira.
Maibé husu atu Polítiku sira tenke muda hanoin sira-ne'ebe dehan obstakulu, tanba média ne'e tenke sai parseiru krítiku ba politiku sira, parseiru kritiku ba sosiedade nian, liliu atu kontribui ba objetivu komún no hari’i sosiedade ne'ebé demokrátiku Timor ninian, sosiedade ne’ebé mak inkorpora ho rai selseluk, plataforma rejionál sira. (*)
