Tuir informasaun ne'ebé www.tempotimor.com, asesu husi pájina Média Parlamentu Nasionál, sesta (26/08) katak, hafoin vizita no kari ai-funan ba rate Ibu Ade Rostina Sitompul iha Jakarta Indonézia, ekipa delegasaun Prezidente Parlamentu Nasionál hala'o mós vizita no reuniaun ho grupu solidaridade ne’ebé iha tempu rezisténsia apoiu Timor-Leste nia independénsia.
Prezidente Parlamentu Nasionál, Aniceto Longuinhos Guterres Lopes hatete, maske dadauk Timor-Leste hetan ona nia Independénsia no demokrasia la'o di’ak tebes maibé la akompaña ho dezenvolvimentu ne’ebé di’ak.
“Tanba ne’e palavra A luta Continua tenki hakilar nafatin maibé luta ho dimensaun foun mak lori dezenvolvimentu no prosperiadade ba Povu”, dehan nia.
Maibé kona-ba grupu solidaridade ne’e envolve husi estudante timoroan ho Indonézia ne’ebé ejiste ho objetivu luta ba Independénsia Timor-Leste no demokrasia ba Indonézia.
Reprezentante Grupu Solidaridade Indonézia ba Timor-Leste, Joshon Panjaitan hatete, vizita no sorumutu husi ekipa Delegasaun PPN ho sira ne’e importante tebes hodi hametin nafatin lasu amizade entre grupu solidaridade no ativista direitu humanu no demokrasia.
Tanba liberdade no demokrasia ne’e labele lori razaun dezenvolvimentu hodi haluha prinsípiu ne’ebé uluk defende husi atevista sira.
“Labele lori razaun dezenvolvimentu hodi haluha, prinsípiu ne’ebé uluk ita defende, satan haluha ami besik liuba (sira) ne’ebé la ideia ho Ita”, dehan nia.
Iha ekipa delegasaun Prezidente Parlamentu Nasionál mak hanesan Eis Romo Sandewa, Joshon Panjaitan, Dedi Syech, Wilson, Rico Aditjondro, Hilman Farid. (*)