“Ami husi komisaun konjunta, seremónia resesaun no missa agradesimentu ba Kardiál primeiru Timorense ninian ne’ebé sei realiza iha 5 to’o 6, osan mai husi Konferénsia Episkopál Timorense nian nomós apoiu husi Governu ho montante $220 mill liu ne’ebé komisaun konjunta ne’e iha”, dehan Padre Guilhermino da Silva hafoin finaliza enkontru ho Prezidente Repúblika, José Ramos Horta iha Palásiu Prezidensiál Bairo Pite, sesta (26/08).
Ba preparasaun ida-ne'e, Komisaun Organizadora mós hato’o ba Xefe Estadu sekuénsia ba seremónia loron rua nian, aleinde konvida Xefe Estadu atu partisipa mós tanba ida-ne’e nu’udar onra boot ba povu no nasaun Timor-Leste tanba foin dahuluk timoroan ida hetan kardinál husi Vatikanu.
Maske pozisaun Kardiál ne’e hanesan pozisaun ida iha uma kreda Katólika ninian, no sei servisu hamutuk ho Papa iha Vatikanu maibé la siknifika Arsebispu Dom Virgílio sai ona Kardiál husi Timor. Tanba nia sei hanesan Bispu nafatin, no hanesan Kardiál hela iha Timor, no servisu iha Timor-Leste.
Dadauk parte husi Komisaun Organizadora laiha atividade seluk, só resesaun iha loron 5 dader de'it no hotu sei ba Aeroportu Prezidente Nicolao Lobato atu simu Kardeál Dahuluk Timor-leste nian ne’ebé foin fila husi Vatikanu, no iha loron 6 mak foin selebra missa agradesimentu iha Tasitolu.
Ba preparasaun ida-ne'e parte Governu halo ona sira-nia servisu balun iha terenu, tantu iha tasi tolu no iha Aeroportu ne'ebé sai fatin ba seremónia Resesaun inklui iha parte administrasaun liga ho konvite sira.
Maibé ba fali Komisaun Organizadora mós iha planu sei konvida mós Bispu sira iha nasaun viziñu sira hanesan Darwin, Atambua, no Kupang, bainhira sira iha posibilidade bele partisipa iha missa agradesimentu ba Kardiál primeiru Timorense nian.
Enkuantu ba konvite ne'ebé hato'o, Prezidente Repúblika José Ramos Horta hatete nia parte sente kontente no promete ba komisaun Organizasaun CET disponivel atu partisipa iha seremónia resesaun iha Aeroportu nomós missa agradesimentu iha Tasitolu.
Tuir oráriu, Kardiál primeiru Timorense ne’e sei to’o iha Aeroportu Timor-Leste, iha loron 5 no tuku 6 dader ho aviaun Aero Atlántiku tuun (landing) iha Aeroportu internasionl Prezidente Nicolao Lobato. (*)
