Sekretariu Estadu Kooperativa, Elizário Ferreira, hatete, hala’o audénsia durante loron rua ho Komisaun D no Komisaun C hodi klarifika ba deputadu sira kona-bá progresu no dezafiu sira iha tinan 2022 nian inklui programa ne'ebé sei hala'o iha tinan 2023.

"Audénsia ne'e, SEKOOP hato'o kona-bá dezafiu no progressu ne'ebé mak ita enfrenta, eh hato'o mos ba distintu deputadu sira katak, servisu ne'ebé SEKOOP halo durante tinan 2022 nomos sei kontinua mos ho programa sira ne'ebé hala'o iha 2023, ida-ne'e mak hato'o ba deputadu sira Komisaun D ho C, durante loron rua tuituir malu," dehan nia ba www.tempotimor.com iha knaar fatin, Akait, kuarta (12/10).

Dadaun OJE tinan fiskál 2023 prevee ba Sekretáriu Estadu Kooperativa (SEKOOP) ne'e ho montante millaun US$4.9 ne'ebé fahe kada rúbrika hanesan Salariu vensimentu US$2,194.072, Akizasaun de bens korentes US$217.129, Bens servisu US$1,357.985 no Kapitál Menor US$85.628.

Orsamentu tinan 2023 ne'ebé prevee ba Sekretariu Estadu Kooperativa ne’e, sei utiliza ba programa 10 hanesan, fortalesimentu instituisional, edukasaun formasaun no informasaun, kapitalizasaun kooperativa ba joven, merkadu ba produtor sira, promove kriasaun reforsa kooperativa agrikula, kooperativa da produsaun agro-pekuária, kooperativa peskas, nomos programa ida bolu naran Medisina-Verdi.

Programa hirak ne'e la'os foin mak hala'o, maibé ne'e hala'o desde iha tinan 2020, ne'ebé konsege fo formasaun ba joven lubuk ida atu hala'o servisu iha nivél báze kooperativa nian.

Orsamentu Jeral Estadu 2022 ba SEKOOP ho montante US$44,605.000 no ezekuta ona 18 pursentu, maibé orsamentu ne'e relasiona ho orsamentu Cesta Bázika.

Ezekusaun OJE 2022 ne'e SEKOOP atinje de'it pursentu 18 tanba orsamentu ba bens no servisu liliu relasaun ho formasaun ne'e barak liu mai husi ajensia internasionál ne'ebé iha koopeerasaun ho SEKOOP.

Ajensia ne’ebé fó apoiu mak, UNDP, AGRA, Word Vision, Care Internasional, UNCDF-Union Europea, Corpo da Paz, COICA, ho CPLP, Embaixada Portugal, Embaixada Brazil, Embaxada Kuba, Embaixada Bankok, Embaixada Indonezia, Embaxada Nova Zelandia,  Embaxada Australia, Plan Internasionál, Universidade Estranjeiru hanesan Universidade Penjajaran, Universidade Udayana Bali, inklui sira seluk tán.

Durante ne'e, ajensia internasional hirak ne'e, halo kooperasaun ho SEKOOP hodi fó apoiu ba área hanesan formasaun, kapasitasaun no kriasaun sede kooperativa.

Purtantu hahú husi fulan-janeiru to'o 15 setembru tinan 2022, SEKOOP hala'o ona formasaun ba ema-na'in 5.133 ne'ebé barak liu kompara ho formasaun sira iha tinan 2021 ne'ebé hetan partisipasaun husi ema-na'in 4.984.

"Ne'e atu hatudu katak, servisu sira la'o di'ak, ladun iha gastus boot tanba servisu ida formasaun dijitalizasaun ne'e hetan apoiu husi exterior, tanba programa dijitlizasaun ba kooperativa sira hetan apoiu husi UNCDF husi Uniaun Europeia nian," nia relata. (*)