"Ohin Konsellu Ministru mós delibera ona hodi autoriza despeza kona-ba ezekusaun obra ba konstrusaun estrada entre Uatulari-Laisorulai iha Munisípiu Vikeke ho extensaun 22.527 km (kilometro) ho valor estimadu serbisu nian hamutuk US$22.7", dehan Minístru Prezidensia Konsellu Ministru, Fidelis Leite Magalhaes iha Palásiu Governu hafoin reuniaun Konsellu Ministru, kuarta (15/02).
Projetu konstrusaun ne'e aprezenta husi Minístru Obras Públikas, Abel Pires iha reuniaun Konsellu Ministru ne'ebé delibera ona.
Antes ne'e Ministru Obras Públikas mós informa reabilitsaun estrada husi Postu Administrativu Kelikai liga ba Postu Administrativu Ossu, Munisípiu Vikekeke, kompaña ne'ebé manán tenderizasaun hahú ona servisu.
"Ita boot sira ba haree de’it kompaña iha ne’ebá hotu ona la iha tan buat ida atu impede, ha’u deklara fila-fila prosesu iha ne’ebá finál tiha ona, osan ida atu selu ba ita nia komunidade afeitadu sira ne’e iha ona BNCTL ita rezolve tiha ona ne’ebé ne’e kestaun de ezekusaun, kompaña no supervizaun iha hotu, buat hotu 100 pursentu la iha tan kestaun administrativu atu impede, tanba dadaun kompaña servisu maka’as hela iha ne’ebá, ne’ebé tuir lolos ita lalika deskute tan”, dehan nia. (*)