Ameasa ne’e liga ho mandadu buska no aprrenasaun ne’ebé hala’o ba rezidensia atuál asesór prinsipál Prezidente Repúblika, Longuinos Monteiro nian iha Loes, Suku Vatu Voro, Postu Administrativu Maubara, Munisípiu Likisa bazea ba mandadu hosi Tribunál Distritál Dili (TDD) ho nnúmeru úniku kriminál (NUC) 0030/23/PCIC iha loron 09 fulan-fevereiru tinan ne’e.

Nune’e, Prezidente Repúblika, José Ramos Horta sei aplika denúnsia públiku no hakotu enkontru semanál ho Primeiru Ministru, Taur Matan Ruak bainhira la demite Diretór SNI.

"Kazu ida Loes ha'u iha dia 9 ha'u viajem husi Cambera mai Darwin ha'u iha aviaun laran señór Ministru Fidelis telfone ba ha'u dehan, Prezidente Repúblika preokupadu loos, tanba SNI atu ba revista señór Longuinhos nia uma, tanba ne'e husu ba Primeiru Minístru hasai Diretór SNI nian, se la hasai Prezidente iha obsaun rua, ida denunsia ba públiku no rua hapara enkontru semanál ho Primeiru Minístru", dehan PM Taur iha Sala VIP Aeroportu Internasionál Nicolau Lobato, Komoro, (21/02).

Tanba ne’e, Primeiru Minístru, Taur Matan Ruak fó resposta katak, sei simu hotu opsaun rua ne’ebé fó hosi Prezidente Repúblika.

"Ha'u iha aviaun laran ha'u responde ba Ministru, hateten ba Prezidente rua ne'e ha'u simu hotu ba públiku mós ha'u simu hapara enkontru ho Primeiru Minístru mós ha'u simu", PM resposta.

Tanba, Primeiru Minístru buka hatene kona-ba razaun husi opsaun rua ne’ebé Prezidente Repúblika fó ne’e relasiona ho despaixu mandadu husi Tribunál ne'ebé autoriza Polísia Sientífika Investigasaun Kriminál (PCIC-sigla portugés) atu halo buska no aprensaun ba Longuinhos Monteiro nia uma liga ho rai kilat.

"Ha'u to'o iha Darwin haruka ha'u nia xefe Gabinete buka hatene, saida mak akontese iha ne'ebá, kuandu ha'u buka hatene sira haruka mandatu Tribunál nian, entaun ha'u hakfodak, tanba se ida ne'e mandadu Tribunál, tanba saida mak Prezidente Repúblika fó fali ultimatum ba Primeiru Minístru", nia kestiona

Ho razaun hirak ne'e, Primeiru Minístru konsidera Prezidente Repúblika abuzu poder, tanba ne'e husu atu labele akontese tán.

"Ha'u hanoin ida ne'e abuzu poder, pre-potensia oituan husi parte Prezidente da Repúblika nian e ke labele", PM haktuir.

Prezidente Repúblika ne'e órgaun ida ke simbolu nasaun nian entaun nia tenke sukat nia komportamentu hotu nia sukat nia kuidadu labele hanesan fali Coboiada.

"Ne'e labele e mais iha Timor ne'e la iha ema ida iha lei nia leten inklui Prezidente Repúblika, hotu hotu iha lei nia okos, ha'u Eis Prezidente, tanba ne'e ha'u hatene ne'ebé ha'u preokupa oituan mais ita aprende ne'e dalaruma tanba sira ne'ebé fó informasaun ba nai Prezidente fó sala, tanba ne'e kalma lai, bidu uluk tenke hanesan ne'e", nia akresenta. (*)