Diretór STAE Baukau, Natividade Freitas Guterres, esplika, kandidatura brigadista ne'ebé liu ona selesaun hamutuk na'in-150 ba rekrutamentu husi STAE Baukau, oras ne'e hetan ona asina kontratu husi Governu, ne'ebé hahú ona.
"Sira ohin simu ona orientasaun hodi ba iha fatin sentru votasaun halo levantamentu dadus, fatin ne'ebé la asesu karreta, eletrisidade liña internet", dehan nia iha kna'ar fatin, Vila Nova Baukau, Kuarta (08/03).
Alende brigadista sira mós sei fahe informasaun ba rekrutamentu poling staff nian iha nivél suku hodi akompaña eleisaun parlamentár nian.
"Ohin ha'u mós orienta sira segunda hotu-hotu mai ho dadus, para fatin ne'ebé presiza orsamentu ruma bele enkamiña iha planu operasionál", nia akresenta
Enkuantu totál votantes provizóriu iha Munisípiu Baukau hamutuk rihun 90, posilibilidade sei aumenta, tanba prosesu resesiamentu iha baze kontinua la'o.
Entretantu Munisípiu Baukau nia área luan 1,504.2 km2 kompostu husi Postu Administrativu-6, Suku-59, nia totál populasaun hamutuk 126,562, eleitór provizóriu rihun 90, tuir planu sei estabelese sentru votasaun 150 ba eleisaun parlamentár tinan 2023. (*)