SEA Konsidera Horta Ko'alia 'Mamuk'

Sekretariu Estadu Ambiente, Deometrio Amaral de Carvalho Sekretariu Estadu Ambiente, Deometrio Amaral de Carvalho Foto Midia SEA

Tempotimor (Dili) - Sekretáriu Estadu Ambiente (SEA) hataan akuzasaun Eis-Prezidente Repúblika, Jose Ramos Horta, ne'ebé kestiona katak, investementu Pelican Paradise la la'o tanba atribusaun lisensa ambientál seidauk hasai.


"Ha'u despois haree uitoan iha live streaming entervista ne'e (www.tempotimor.com ho Eis-Prezidente Repúblika, José Ramos Horta) buat ne'ebé ha'u atu hatete katak, Dr.Ramos Horta, Laureadu Nobel ba Paz ne'ebé ha'u respeita, koalia laiha faktu. Ita hatene katak, Pelican Paradise mai kedas iha IV Governu to'o mai iha VIII Governu no VIII Governu mak Primeira-ves fó lisensa ambientál," dehan Deometrio Amaral, iha knaar fatin, Segunda (17/2).

Nia hatutan, lisensa ne'e hasai iha loron 9 Novembru 2018. Fulan tolu hafoin Sekretáriu Estadu Ambiente simu pose.

Sekretáriu Estadu Deometrio akresenta, lakohi komenta ba kotuk prestasaun servisu Governu anteriór,  liuliu prosesu ambientál ne'ebé la'o kleur.

"Buat ne'ebé ha'u konsidera importante atu asegura investementu sira iha Timor-Leste maka, ida lisensa ambientál ne'e rasik", tenik nia.

Konsidera ba ida ne'e, dezde emite nu'udar Sekretáriu Estadu, too ohin loron, Deometrio emite ona lisensa ambientál hamutuk 304 durante fulan 20 nia-laran.

Sekretáriu Estadu ne'e konsidera, kualkér investementu boot husi estranjeiru importante ba Timor-Leste sempre atribui lisensa no renova lisensa ambientál hanezan ba Suai Supply Base, Konstrusaun Portu Tibar, no projetu seluk tan.

"Projetu boot ne'ebé importante ba dezenvolvementu, ita asegura ho kuidadu no emite lisensa iha nia tempu. Ida ne'e mak ita hakarak halo para garante ambiente ne'ebé saudável hodi atrai investimentu estranjeiru," dehan Deometrio.

Antes ne'e, liuhusi streaming www.tempotimor.com, Eis-Prezidente Repúblika, José Ramos Horta, akuza Sekretáriu Estadu Ambiente la hatene servisu no inventa hodi impata ba investementu Pelican Paradise.

Ramos Horta hatete, investementu estranjeiru la mai tanba problema iha governasaun oioin. porezemplu, Pelican Paradise, tinan sanulu ona seidauk iha desizaun ruma.

"Mai, Governu (liuhusi) Sekretariu Estadu Ambiente ida fó ona konkordansia. (Depois) Sekretáriu Estadu Ambiente foun ida la hatene buat ida, inves-de ba haree estuda dokumentu ida ba kotuk ne'e, maibé inventa tun-sa'e fali. Ha'u nunka haree iha mundu ne'e rai ida  komplikadu hanesan ita nian ne'e, ke governu, Estadu inves fó apoiu dada investidór mai, trata investidór hanesan saida. Barak hein mak envelope," dehan nia, iha knaar fatin, Faról, Segunda (17/2).

Eis-Primeiru Ministru ne'e relata, institusaun kompetensia sira hanesan Terras Propriedade, Ministériu Justisa, Sekretáriu Estadu Ambiente, Trade Invest, sira mak bele esplika tanbasá mak to'o agora Pelican Paradise paradu.

Ramos Horta akuza membru Governu b***k-t**n ida no impata prosesu burokrasia, inklui mós sosiedade sivíl ne'ebé gosta impata, maibé laiha esperiensia relasiona investimentu inklui negósiu. (*)

Rate this item
(1 Vote)
Last modified on Tuesday, 18 February 2020 08:19
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.