Tuir Ministra Sara, daudauk ne'e maske implementa ona estadu emerjensia, maibé jeralmente atividade la'o normal.

"Agora ita bele dehan estadu emerjénsia, maibé situasaun ne'e bele dehan normál tanba kuaze ema hotu sei hala vida normál, so ita aplika mak distansia sosiál, fase liman beibeik inklui taka maskara," dehan Sara iha PN, Sesta (03/04).

Nia hatutan, governu mós seidauk haree iha nesesidade atu halo intervensaun maka'as ba Covid-19.

"Intervensaun maka'as ba covid-19 ne'e ita seidauk haree nia nesesidade boot iha ne'e," dehan nia.

Maibé, nia dehan, bainhira tama ona ba situasaun Covid-19 nia gravidade aas, governu sei buka maneira atu fó apoiu ba ema hotu-hotu.

"(Se) ita tama ona ona situasaun ida ne'ebé Covid-19 nia gravidade aas mak ita sei buka par ema hotu-hotu hetan apoiu, laiha diskriminasaun tan ba ida ne'e, tanba ita tenke proteje ita-nia aan no mós ema seluk," dehan Ministra ne'e.

Kona-ba orsamentu ne'ebé PN aprova, ministra ne'e dehan, governu sei esforsu hodi sei ezekuta didi'ak orsamentu refere hodi bele halo prevensaun ba Covid-19 no garante katak ema seluk labele sai fali vítima.