PM Taur hato'o kestaun ne'e relasiona ho informasaun balun ne'ebé hatete katak governu aprova ona subsidiu refere.
"Osan $100 ba kada familia ne'e diskusaun sei la'o hela, seidauk iha konkluzaun ida," dehan PM Taur iha Palásiu Prezidensiál Bairro-pite Dili, Kuarta (08/04/2020).
Xefe governu ne'e dehan, buat ne'ebé governu haree daudauk mak kontinua esforsu atu taka provizoriu fonteira no apoiu subsidiu ba estudante Timor-oan iha rai li'ur.
"Buat ne'ebé ohin ami haree mak suspende temporariamente entrada husi via terestre no ida seluk mak ita tau osan uitoan hodi apoiu ita-nia estudante sira hotu iha Indonézia no nasaun seluk ne'ebé la'ós bolseiru tanba sira hela iha ne'ebá," dehan PM.
Iha fatin ketak, Ministru Koordenadór ba Asuntu Ekonomika (MKAE) interinu Fidelis Manuel Leite Magalhães iha ninia pajina facebook afirma, MKAE aprezenta ona proposta subsidiu ba uma-ka'in ba Konsellu Ministru (KM) maibé seidauk hetan aprovasaun.
"Ha'u ohin foin halo aprezentasaun ba KM hafoin rekolla proposta husi liña ministeriál sira, seidauk iha aprovasaun. Tanba presiza ajuda tan regulamentu no pontu balun depois aprezenta hikas ba KM hodi halo desizaun iha semana oin," dehan Fidelis iha Kuarta (08/04) tuku 23:04 OTL.
