Tuir portavoz Sentru Integradu ba Jestaun Krize (SIJK) Dra, Odete da Silva Viegas katak, maske nia halai ona, maibé ita iha ona dadaus, hein buka tuir de'it nia hela fatin.
"Ohin verbalmente iha mós informasaun husi Komandante PNTL Munisípiu Dili Superentedente Xefe Armando Monteiro kona-ba kazu ida ne'e," dehan Odete iha sala situasaun ba jornalista sira, Domingu (19/04)
Entretantu bainhira SIJK rona katak kazu sintomas ba corona virus diseases 2019 hahú hatudu ona iha komunidade lokál mak SIJK komunika kedas ho ESVE hodi foti dadus.
"Ohin rona ami informa kedas ba ekipa servisu vizilánsia epidemolójika para buka hatene. Tanba ne'e maske nia halai mós ita iha dadus ona, hodi buka tuir nia hela fatin iha ne'ebé," nia dehan.
Relasiona ho sidadaun ne'ebé halai husi Sentru Saúde Comoro, dra. Odete katak, lakohi iha diskriminasaun.
"Nia halai tanba hatudu stigma ka diskriminasaun, karik iha ema ruma ne'ebé mak iha sintomas, nia lakohi expose nia aan tanba lakohi ema hatene katak nia pozitivu ba Covid-19, entaun ida ne'e bele sai problema," dehan DJPS
Entretantu observasaun jornalista tempotimor.com iha terenu ohin tuku 14:17 katak, ekipa servisu vizilánsia epidemolójika foti ona dadus.
Bainhira jornalista tempotimor.com husu pesoál ESVE atu esplika maibé pesoál ne'e rasik dehan rekolla dadus de'it.
Señor bele esplika ba ami, oinsa ita boot sira mai foti dadus ba ita nia sidadaun ida ne'e? "Ne'e ekipa vizilánsia epidemolójika mai rekolla dadus de'it, buat ne'e dezentendimentu de'it, ne'ebé ami labele fó informasaun," dehan pesoál SVE ne'e.
iha fatin hanesan maun husi suspeitu ne'e dehan, nia alin la'ós mai husi rai liur.
"Alin ne'e la'ós mai husi rai liu, nia iha ne'e kedas, soké ohin dadersan mak nia mear, entaun nia ba konsulta iha klinika, depois dehan fali nia pozitivu Covid-19, ida ne'e laloos," dehan suspeitu ne'e nia maun.
Maun husi suspeitu ne'e dehan, "Depois iha ne'e xefe aldeia ne'e mós familia, maibé karik tanba la gosta malu, entaun telefone ba polísia no media sira katak dehan alin ne'e pozitivu ba covid-19," dehan suspeitu ne'e nia maun ba tempotimor.com
Iha observasaun tempotimor.com nian nota katak, ekipa servisu vizilánsia no epidemolójika ne'ebé ba rekolla dadus iha suspeitu nia uma, ekipa sira uza Ekipamentu Protesaun Individual (EPI), ne'ebé akompaña husi seguransa Polísia Nasionál Timor Leste (PNTL)
Tuir autoridade ida ne'ebe husu labele publika nia identidade dehan, alin ne’e iha Timor Leste de'it maibe, "nia ransu ho ninia prima ne'ebe foin fila husi Wuhan, Xina."
Nia esplika katak teste halo ona no durante hein rezultado alin ne'e sei iha auto kuarentena iha nia uma iha Fumento.
.