Rui dehan, atu hala’o serbisu ne’ebé Primeiru Ministru fó, nia tenke iha ekipa ida hodi bele halo serbisu no analiza dadus hirak ne’ebé iha.
"Ohin ha'u mai simu orientasaun husi Primeiru Ministru, liu-liu oinsa atu serbisu ba oin ne'e, entaun hahú Segunda (08/06) semana oin, ha'u mós tenke forma ekipa ida, tanba ida ne'e ezersísiu ida ne'ebé komplexu, ezersísiu ne'ebé envolve rigór akadémiku, tenke análiza dadus sira ne'e par ita mós bele ko'alia," dehan eis Ministru Finansas iha governu dahitu ne’e hafoin hasoru-malu ho PM Taur iha palasiu governu, Sesta (05/06).
Hafoin forma ekipa, nia hatutan, nia parte sei serbisu hamutuk ho parte relevante sira hodi diskuti estratejia atu avansa rekuperasaun ekonomia.
Hatan kona-ba konfiasan PM Taur ba nia, Rui dehan, nia sente hetan previléziu hodi lidera ekipa ne'ebé importante atu rekupera ekonomia Timor-Leste.
"Ida ne'e previléziu boot ida ba ha'u, tanba hetan konfiansa husi Primeiru Ministru (PM) atu lidera ekipa ida ne'ebé importante tebes," dehan Rui.