CNRT: Governu Hamosu Injustisa Hasoru PS Iha Front Line

Plenaria Parlamentu Nasional Plenaria Parlamentu Nasional Foto File

Tempotimor (Dili)-Bankada Kongresu Nasionál Rekonstrusaun Timor (CNRT) iha Parlamentu Nasionál (PN) konsidera governu liu-liu Ministériu Saúde (MS) halo injustisa boot hasoru pesoál saúde sira ne'ebé durante ne'e dedika aan hodi luta kontra pandemia Covid-19, tanba estadu emerjénsia loron 60, maibé governu apoiu de'it subsídiu loron 37 nian.

"Husu ba Ministru Finansas (MF) defaktu atu hato'o ba Ministra Saúde (MS) defaktu kona-ba subsídiu ne'ebé atribui ba iha pesoál saúde sira. Tanba estadu emerjénsia loron 60, maibé realidade konta de'it mak loron 27, depois pesoál saúde sira halo protestu mak sura aumenta tan loron 10, emtaun governu atribui de'it subsídiu ba loron 37 nian, saida mak ida ne'e? EE ita hatene nomós katak loron 60," dehan Deputadu CNRT Gabriel Soares hafoin MF ho Vise-MF no ekipa aprezenta levantamentu daruak ba transferénsia extraordináriu husi fundu petrolíferu daruak nian ba PN, Segunda (22/06).

Nia afirma, governu mós laiha fuan, tanba halo diskriminasaun subsídiu ba pesoál front line sira.

"Iha pájina 9 ne'ebé governu providénsia mai, iha fraze ida ne'ebé ha'u lee katak, "a desvalorisação e discriminação do valor do subsidio", tanba saida mak ita boot sira halo diskriminasaun ida ne'e, ita boit sira sei iha Konxiénsia morál, atu fó subsídiu ba ita nia pesoál liña frente sira?," dehan Gabriel.

Nia mós dehan, loloos ne'e governu tenke fó subsídiu hanesan ba pesoál front line sira.

"Liu-liu sira ne'ebé servisu iha lina oin hanesan pesoál saúde sira fó dolar $15 kada loron, pesoál kliner sira dolar $5 kada loron, agora osan aprova iha ne'e atu fó ba sira, ha'u sei lembra, deputadu Assanami dehan iha momentu ne'ebá katak, se di'ak liu fó subsídiu ba ita-nia pesoál liña frente ne'e hotu dolar $40 kada loron, maibé realidade iha ne'ebé?," nia dehan.

Nia mós husu ba governu atu labele lori povu nia naran, atu foti osan maibé jere konforme gostu.

"Ami husu ba ita-boot sira, favór labele lori traballadór sira nia naran mai foti osan, mais to'o iha ne'ebá jere tuur ita-boot sira nia gostu, tanba ne'e labele halo diskriminasaun ba kbiit laek sira," nia dehan

Hatán ba kestaun ne'e, vise Ministra Finansas (vise-MF) Sara Lobo Brites katak loos duni apoiu subsidiu ba pesoál front line sira governu apoiu de'it fulan ruan nian.

"Subsídiu ba pesoál saúde sira, valór subsídiu ne'ebé mak diskrimina ne'e hetan aprova iha Konsellu Ministru (KM) tanba tetu mós ba montante orsamentu ne'ebé iha," dehan Sara.

Nia mós rekoñese katak, EE durante fulan tolu, maibé governu atribui de'it subsídiu fulan rua nian ba pesoál front line sira.

"Loos duni, EE fulan tolu, maibé ita atribui de'it subsídiu fulan rua nian ba pesoál saúde sira, PNTL no Defeza nomós apoiu agregadu sira ba de'it fulan rua, tanba limite mós ba fundu, maibé só úniku ba estudante sira ne'ebé iha estranjéiru mak governu fó subsídiu fulan tolu nian ba estudante sira tanba iga ne'ebá situasaun Covid-19 sei maka'as," nia dehan.

Rate this item
(1 Vote)
Last modified on Tuesday, 23 June 2020 09:13
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.