FRETILIN Lekar Xanana Nia Pekadu ba Kontratu millaun $60 ba GMN

Prezidente da Republika, Dr. Francisco Guterres Lu Olo, Prezidente CNRT, Kay Rala Xanana Gusmao, Sekretariu Jeral partidu FRETILIN, Dr. Mari Alaktiri no eis Prezidente da Republika, Dr. Jose Ramos Horta foto hamutuk iha momentu ruma sei di'ak malu nian Prezidente da Republika, Dr. Francisco Guterres Lu Olo, Prezidente CNRT, Kay Rala Xanana Gusmao, Sekretariu Jeral partidu FRETILIN, Dr. Mari Alaktiri no eis Prezidente da Republika, Dr. Jose Ramos Horta foto hamutuk iha momentu ruma sei di'ak malu nian Foto Suplai

Tempo Timor (Dili)-Hafoin deputadu CNRT halo akuzasaun hasoru Sekretariu Jeral partidu FRETILIN Mari Alkatiri simu suborno husi kompaña ConocoPhillips, deputadu FRETILIN mós hahú hasai akuzasaun ba Prezidente partidu CNRT Kay Rala Xanana Gusmão.

Deputadu FRETILIN Joaquim dos Santos kestiona kona-ba kontratu ne'ebé Xanana asina bainhira nia sei sai Primeiru Ministru.

Joaquim dehan, iha momentu ne'eba, Xanana fó kontratu ho valor millaun $60 ba Grupu Media Nasional (GMN) ho ninia konsorsiu la liu husi prosesu tenderizasaun.

"Rezolusaun numeru 28/2013, 4 Dezembru 2013 kona-ba Aprova o Contrato de Criação do Cadastro Nacional ne’ebé assina rasik husi Primeiru Ministru Xanana Gusmão iha momentu ne’ebá, entrega kontratu ne’e ba konsorsiu ne’ebé GMN hola parte, tanba GMN mak empreza Timor-oan úniku ne’ebé ho objetu sosial iha área ba," dehan deputadu FRETILIN ne'e iha PN, Kuarta (01/07).

Tuir nia, alega, iha tinan 2007 to'o 2008, empreza GMN Holdings ne'ebé ofisialmente iha sosiu rua, Señor Jorge Serrano no Señora Celia Serrano, loke nu’udar empreza ida ne’ebé servisu iha area jestaun, administrasaun no financiamentu emprezas, exportasaun no importasaun .

Maibé, nia alega, rezolusaun ne’ebé Primeiru Ministru Xanana asina deklara katak kompaña GMN Holdings iha kompetensia iha area foun.

"Ami iha duvida uitoan ne’ebé presiza klarifikasaun. Tanba de'it ita tau iha objetu sosial mak hatudu kompetensia, no experiensia anterior saida mak iha atu justifika katak empreza ida ne’e iha kompetensia atu halao servisu ne’ebé boot no importante ba ita-nia rai? no oinsa mak bele hatene katak empreza ida ne’e mesak de'it mak iha kompetensia iha area refere, se governu la loke tenderizasaun atu empreza seluk bele konkore?".

Aleinde ne'e,  Joaquim informa katak, bankada FRETILIN prepara hela no sei hatama keixa ida kona-ba serbisu rejistu kadastrais ba Ministeriu Publiku hodi husu investigasaun.

Rate this item
(6 votes)
Last modified on Wednesday, 01 July 2020 16:25
Tempo Timor

Ho hakraik an Tempo Timor hato'o komprimentus ba laitor sira katak, Jornal Tempo Timor hahu mosu iha imi le'et atu fasilita informasaun ba imi. Tamba ne'e ami presiza ita boot sira nia tulun atu ekipa jornal ne'e nian bele halao servisu jornalismu ho didiak.

Jornalista Jornal Tempo Timor, bandu atu hetan envelope ka sasan ruma husi fontes informasaun sira.

www.tempotimor.com

.