"Oteis no mós sira ne'ebé prepara hahan ba pasiente sira ho profisionál saúde sira ne'ebé liga ba asuntu Covid-19 nian ne'e, ha'u hanoin la lakon sira-nia orsamentu, maibé ha'u konsidera atrazu oituan," dehan nia, hafoin hasoru-malu ho Ministru Prezidénsia Konsellu Ministru, iha Palásiu Governu, Segunda (20/07).
Nia esplika, kompañia balun halo ona pagamentu no balun seidauk tanba, presiza halo fali verifikasaun ba nota.
"Uha ida-rua mós presiza halo verifikasaun ba nota ne'ebé iha tanba, dokumentu balun ne'ebé presiza kompleta," tenik nia.
Alende ne'e, Ministra Saude (MS) mos informa, pagamentu suplementu renumeratóriu ba pesoal saúde sira ne'ebé lina frente sei bazeia ba oráriu.
Tuir nia, Ministériu Saúde halo ona verifikasaun ba problema ne'ebé pesoál saúde sira kestiona kona-ba pagamentu balun iha de'it loron 38.
Ministra ne'e dehan, pagamentu ba pesoál saúde sira la'o mosu kestaun balun tanba, iha parte servisu tékniku ninian hanesan front line ne'e fahe ba kategória no tuir oráriu ne'ebé tama servisu.
"Ami deskuti balun hakarak tenke selu 60 dias maibé, iha rezolusaun governu nian ne'ebé mak ko'alia kona-ba loron efetivu ne'ebé pesoál saúde sira halo sira-nia knaar no liga mós ho orden servisu husi sira-nia superiór sira, entaun ita selu bazeia ba oráriu servisu ne'ebé sira iha ona," dehan Odete.
Nia mos husu ba pesoál saúde ne'ebé sente la satisfás ho kritériu sira ne'ebé Ministériu Saúde determina ona, entaun bele halo fila-fali verifikasaun, nune'e bele halo fali pagamentu ba sira. (*)