Diretór Ezekutivu CDT-TL, Costancio Pinto informa, apoiu husi MCC ba Timor-Leste ne’e atu ajuda hadia di’ak liu tan sistema edukasaun, aqua no saneamentu, no drainajen.

"Neste momentu ita hetan apoiu husi Amerika liu husi ajensia ida naran Millennium Challenge Corporation (MCC) hamutuk $285,000 de dollares, ne'e fó de"it mai ita atu investe iha area edukasaun nian, ho áqua saneamentu, drainajen iha Dili," dehan Constánçio ba jornalísta sira iha MSSI, Kaikoli (24/07).

Nia hateten, apoiu husi Amérika mai TL hanesan oporunidade di’ak tanba TL sei la selu fila osan refere.

"Ita só selu de'it ho retornu ekonómiku ne'ebé sei hadi'a povu nia vida, hadi'a edukasaun ne'ebé ho kualidade, hadi'a Dili ne'e sai matak liu tan, bonitu liu tan, no ita-nia populasaun mòs isin saudável, i nune'e bele kontribui ba kresimentu ekonómiku iha ita-nia rai laran," dehan nia.

Ba edukasaun, nia esplika, sei harii sentru exelénsia ida ba formasaun professor sira ba ensinu sekundáriu nian, atu nune'e bele eleva sira-nia kapasidade hodi bele hanorin estudante sira ho di’ak liu tan, no mós formasaun ba Jestór eskola sira hodi halo jestaun di'ak ba eskola.

Nia hateten, matéria hodi fornese formasaun ba professór sira mak hanesan, treinamentu kona-ba metodolójia, pedagójia, líderansa, no IT, atu sira mós bele hatene uza teknolójia ba ensinu ninian.

Aleinde ne’e, nia dehan tan, ba implementasaun projetu kona-ba jestaun ba bee foer, sei implementa de'it iha Dili, maibé sei haree mós frabrika ida hodi produz produtu ida naran Colorant, atu halo tratamentu ba bee iha nivél munisípiu tomak iha terrotóriu TL.

Atu bele hala’o ida ne’e, nia dehan, ekipa CDTTL sei halo hela estudu viabilidade. Bainhira remata, foin hahú asina akorsu no implementasaun projeitu refere sei realiza iha tinan oin.