“Horseik ha'u iha viqueque Luca ne'ebá ha'u-nia maluk sira CPD-RDTL silu sira-nia batar, halo kooperativa. Kuandu ema halo hanesan ne'e problema laiha. Ita tuur-tuur hemu tua pois ba tuur lemo-lemo iha estrada ibun mak problema mosu”, dehan nia, iha Palásiu Prezidensiál Bairru-Pité, Kuarta (3/4).
Lere afirma kuandu halo to’os no natar ruma ne’e problema lakon, tanba preokupa ba batar fulin ka la fulin de’it.
Ne'e duni, Xefe Estadu husu ba komunidade sira servisu. Tanba servisu para bele sustenta familia inklui dezenvolve nasaun.
“Timor iha dalan di’ak atu la’o, kestaun mak ita-nia na'i ulun sira hamatuk, ita-nia populasaun hotu iha konxiénsia halo oinsa dezenvolve ita-nia rai hanesan CPD-RDTL halo sira-nia kooperativa iha nivel nasionál”, tenik Lere.
Ne’e mak dehan servisu, tanba la’os ukun-aan para tuur de’it, ukun-aan para servisu no agora livre para la’o ba oin.