Desizaun ne’e relasiona ho rekerimentu hasoru desizaun Tribunál Rekursu nian ikus liu, ne’ebé fó-sai iha dia 8 de Marsu, kona-ba rekursu ba proposta alterasaun
LAP.
“Bankada FRETILIN haree ba desizaun ida ne’e nudár denegasaun flagrante hasoru justisa. Denegasaun akontese bainhira juís ida rekuza atu rekoñese buat ne’ebé nia rasik fiar katak loos. Iha kontestu ida ne’e, ita taka hela matan ba justisa,” hakerek iha komunikadu ne'ebé, tempotimor.com asesu.
FRETILIN dehan, argumenta katak laiha lei ruma atu regulamenta kláuzula konstitusionál sira hatudu dezrespeitu ida inaseitável. Laiha lei ho valór reforsadu tanba Konstituisaun RDTL la prevé. Maske nune’e, kontraditóriamente, laiha mós respeitu ba kláuzula konstitusionál sira ne’e tanba laiha lei.
Konviktu iha ninia pozisaun misaun atu tane aas Estadu direitu, Bankada FRETILIN sei responde imediatamente ba desizaun ne’e tuir Konstituisaun ho lei ne’ebé vigora iha RDTL atu hatuur hikas fali prosesu hotu-hotu iha nia dalan.
Bankada FRETILIN reafirma pozisaun atu nafatin defende direitu Povu Timor-Leste nian, iha jerasaun ne’e no tuir mai atu goza ho benefísiu husi rekursu naturais hotu-hotu forma ida justu no ekitativu.