Eis Primeiru Ministru ne’e dehan, problema boot moras Covid-19 iha mundu mak da'et lalais, la iha ai-moruk atu kura no la biban atu kontrola.
"Hotu-hotu kala rona ha’u la'o, seidauk haleu timor tomak, maibé ha’u la'o uitoan, liu-liu iha fatin ne'ebé ha’u nunka tama, ha’u agradese ba buat at ida Covid ne'e, tanba dudu ha’u ba to'o fatin ne'ebé ha’u nunka tama," dehan Xanana iha aldeia Rembor, postu dministrativu Manatutu Vila, Munisípiu Manatutu, Tersa (08/09).
Lider nasionál ne'e hatutan, durante Estadu Emergensia dahuluk mai to'o agora nia la'o ba komunidade nia leet ho misaun ida atu salva povu husi mate tanba Covid-19.
"Fatin barak ha’u sidauk tama, maibé ha’u la'o ho misaun ida Covid, tanba nia moras aat ida iha mundu. Ha’u buka akompaña nutisia mundu nian, antes ha’u ba atauru besik 10 milloes mak hetan moras ne'e, ha’u fila-fali husi atauru haree fali ba 17 milloes mak hetan moras ne'e, horseik antes toba ha’u loke fali sae bo'ot liu ona 27 milloes hetan moras no mate mos sa'e ba bei-beik",Xanana esklarese
Eis-komadante en-xefe Falintil ne'e mos dehan, to'o agora seidauk iha ai-moruk atu kura moras Covid-19, tan ne'e husu ba povu tomak tenke kumpre regras ne'ebé parte saúde hanorin ona.
"Ema mate ba covid, tanba sidauk iha ai-moruk atu kura, iha nasaun india loron ida kazu foun liu rihun 9, iha fali Inglatera mos sa'e boot tebes, tanba ne'e ha’u la'o hodi esklarese ba povu tomak katak kuidadu ho buat ida ne'e (Covid-19)," dehan nia.
Nune'e durante la'o vizita komunidade halo asaun karidade ne'e ho misaun atu esplika regras prevensaun Covid-19 ba populasaun hotu-hotu.