Major Jenerál Lere Anan Timur hato'o parabéns ba membru PM foun ne'ebé simu graduasaun no sai nu'udar membru PM loloos.
"Imi-nia esforsu ne'ebé durante ne'e ohin to'o ona iha momentu importante ne'e. Durante ne'e imi moris iha Polisia Militár nia fatin maibe imi la'ós Polisia Militár, mas loron ohin imi sai ona Polisia Militár ne'ebé loloos", dehan Jeneral Lere, iha Kuartel Jerál, Kintal Boot, Kinta (17/09).
Nia husu ba membru PM sira hotu atu mantein orden dixiplina iha militár nia-laran, no tenke kumpre dixiplina, sai ezemplár, tenke hatene sai husi situasaun ne'e, no tenke hatene vense obstakulu no difikuldade ne'ebe sadik sira-nia kapasidade.
"Lalika tauk no lalika hakiduk ba kritiku sira ne'ebe fó, maibe brani hodi kumpre buat ne'ebé ami haruka imi halo, dala-ruma imi tauk kritiku, imi tauk ema hase imi-nia sala, maibé sira hase ita tamba sira la domina saida mak militár nia servisu", dehan Lere.
Entretantu, Komandante Unidade Polisia Militár, Majór Abel da Costa Xavier Niki, agradese ba familia sira ne'ebé oferese ona sira-nia oan no bei-oan hodi mai tama iha instituisaun Polisia Militár.
Polisia Militár iha ninia servisu no nia funsaun mak asegura instituisaun F-FDTL no garantia orden dixiplina interna F-FDTL no mos garantia seguransa infrastrutura.
"Ami nafatin servisu iha tempu udan, anin, loron manas maske ekipamentu balun laiha mós ami nafatin servisu, kuandu iha dalan klaran mak la di'ak ami para, maibe por enkuantu sei di'ak ami la'o, no ne'e relidade ne'ebé iha ami-nia unidade", dehan Abel.
Nia mos apela ba membru PM foun katak durante tinan tolu iha unidade PM sira hanesan kadetes seidauk PM, maibe loron ohin sira sai ona PM 100%.
Responsabilidade boot no la'ós sira atu ba hatudu iha fatin-fatin katak sira PM, maibe ida ne'e kna'ar boot ida ne'ebé sira tenke buka atu infrenta situasaun problema sivíl no militár. (*)