Eis-Prezidente Timor Gap, Francisco Monteiro, mudansa hirak ne’e sei fó impaktu maka'as ba servisu sira iha futuru, liuliu ligadu ho prosesu dada kadoras mina mai Timor.
"Sei iha impaktu makaas,” dehan nia, iiha iha Salaun Parokial Igreja Santu António Manatutu, Tersa (29/9).
Tuir nia, razaun sei fó impaktu boot ba servisu Timor Gap nian iha futuru, tanba lakon ona memória institusionál, inklui servisu ne'ebé barak no tuir loloos bele akontese mudansa iha estrutura governu nian, maibé buat importante servisu sira tenke iha kontinuidade.
Nia hatutan, governu bele halo mudansa polítika ba governasaun ho kargu sira hanesan poítika, maibé pozisaun sira hanesan teknika ne'ebé iha kapasidade governu presiza kaer metin atu servisu tenke la'o kontinua nafatin ba oin.
"Hakarak ka lakohi, instituisaun, sistema no mós ema balu ne'ebé presiza kontinua, liuliu pozisaun sira ne'ebé la'ós polítiku, pozisaun prezidente polítiku, konsellu administrasaun polítiku, ezekutivu ne'e tuir loloos ne'e haree ba ema nia kapasidade ema nia esperiénsia, para atu lori buat prosesu sira ne'e ba oin kontinua nafatin", sublina Francisco.
Nia mós lamenta ho mudansa estrutura ne'ebé iha, halo servisu barak mak paradu, projetu sira kona-ba estuda kadoras nian, no estuda LNG nian paradu hotu, entaun prátikamente laiha ona servisu barak iha Timor Gap.
“Staff sira ne'ebé grau ki'ik la halimar foti sae kedas ba iha vise-prezidente, lori sa'e kedas ba iha diretór sira, no halo mudansa lubuk ida ke kompromete tiha sistema ne'ebé montadu iha Timor Gap ne'ebé jufistikadu uitoan”, dehan nia. (*)