Deklarasaun ida ne’e hato’o husi Prezidente Repúblika Francisco Guterres Lú Olo bainhira anunsia ofisialmente renovasaun ba Estadu Emerjensia (EE) daneen iha palasiu prezidensial Bairo-pite, Segunda (05/10).
"Ha’u husu ba komunidade hela besik iha fronteira rai no tasi-ibun atu ajuda nafatin ita-nia PNTL taka dalan ba ilegal sira," Xefe Estadu ne’e apela.
Iha oportunidade ne’e, PR Lú Olo fó saudasaun ba ekipa liña oin ne'ebé luta maka'as hodi lori TL to’o ohin loron sei livre husi transmisaun lokal Covid-19.
"Front line sira inklui pesoál saúde, PNTL, F-FDTL no maluk sira seluk ne’ebé simu responsabilidade hala’o knaar iha terrenu, ha’u hato’o saudasaun espesiál. Ho maluk sira-nia dedikasaun sura kolen la’ek mak Timor-Leste konsege kontrola moras Covid-19 la hada’et ba komunidade to’o ohin loron," dehan nia.
Husi esforsu ne'ebé TL halo ona, PR Lú Olo husu nafatin ba sidadaun tomak iha TL atu kumpre regras prevensaun.
"Ema idaidak iha responsabilidade atu garante susesu ba luta foun ida ne’e," dehan Lú Olo.
Tuir informasaun husi PNTL ne’ebé PR Lú Olo simu, to’o ohin loron ema ne’ebé tama illegal iha TL ne’ebé hetan kaer husi autoridade seguransa hamutuk na’in 146, no daudauk ne’e hala’o hela prosesu investigasaun.
Atu bele hetan susesu hodi livre nafatin husi Covid-19, PR Lú Olo dehan, orgaun soberánia sira mesak labele hetan susesu, maibé presiza komunidade sira nia kontribuisaun hodi garante susesu.