Ministru Joaquim hatete, distribusaun ba sasan iha programa sesta báziku ne'e, semana oin ne'e governu lansa ona, tanba laiha ona problema.
Nia mós dehan, ai-han báziku ne'ebé governu sei fahe ba povu mak hanesan fos, mina, koto, foremungu, fore-rai no seluk tan.
"Kona-ba ai-han lokál ne'e ita tenke sura ho realístiku de'it katak iha posibilidade la to'o, maibé ita mós labele haree de'it ba ida ne'ebé la to'o ne'e, maibé ita mós tenke haree ba sira-nia síkulu ka epoka kuda nian, tanba ne'e mak intensaun husi programa ida ne'e mós oinsa atu estimula produtór sira katak merkadu ne'e mamuk ona, katak sira tenke kuda," dehan Ministru MKAE Joaquim iha Palásiu Governu, hafoin remata reuniaun Konsellu Ministru (KM), Kuarta (21/10).
Alende ne'e sosiedade sivíl sira husu governu atu hasai lista funsionáriu públiku nian iha programa sesta bázika nian, maibé Ministru MKAE dehan, lei mak haruk hodi ema hotu hetan.
"Be ne'e lei ne'e, lei dehan ema hotu-hotu simu, agora ita ba fali kontrolu ka, se lei dehan ema hotu iha direitu simu, entaun ita kumpri lai ida ne'e," tenik nia.
Entretantu loja ne'ebé sei hola parte iha programa sesta bázika ne'e lubuk ida, tanba ne'e lakohi temi naran, maibé iha lansamentu mak bele publika sai.
"Ita sei halo distribuisaun direta, ne'ebé kuandu sasan sira ne'e ba to'o iha ne'ebá mak sira hakarak faan ka fahe fali ba ema iha orfanatu sira ne'e problema sira nian," dehan Joaquim.(*)