Kazu ne'e akontese bainhira deputadu sira husi bankada CNRT la simu linguajen manu kokotek, ne'ebe lansa husi vise Prezidente PN Luis Roberto iha plenaria segunda (26/10).
Deputadu sira husi bankada opozisaun CNRT ho ran nakali hahu haklalak iha plenaria, ikus mai Luis Roberto ne'ebé lidera meza desidi fo tempu ba deputadu sira deskansa minitu 15 iha liur.
Deputadu Jose Pereira konsidera vise prezidente PN tauk teen, tanba la fo fatin ba deputadu opozisaun atu halo intervensaun no defeza de onra, relasiona ho deklarasaun politika FRETILIN nian ne'ebe halo akuzasaun ba partidu CNRT.
Maski nune'e, Vise prezidente PN Luis Roberto hataan ho hamnasa de'it, kona-ba ameasa ne'ebe deputadu CNRT halo.
Luis Roberto hateten, nia parte koalia liafuan ne’e tanba deputadu sira husi CNRT laiha etika no haksesuk malu ho sira neebe dirije meza, tanba ne'e Luis Roberto hasai liafuan ‘deputada ne'e hanesan fali manu kokotek’.
Bainhira hare ba deputadu CNRT Jose Pereira ne'ebe kontinua hasai liafuan sadik no ameasa, maka deputada Olinda Guteres mos hahu dehan, "Imi rua tuku malu tiha”.
Maski nune’e, la akontese tuku malu tanba deputadu sira ameasa malu iha idaidak nia fatin to’o plenaria hotu idaidak fila ba uma.