Úniku deputadu atual Prezidente Parlamentu Nasionál (PPN) Aniceto Guterres mak partisipa, hamutuk ho deputada sira, inklui atual Prezidenti GMPTL, Lidia Norberta, espoza Prezidenti Repúblika, Cidália Nobre Mouzinho Guterres, Sosiedade sivil, membru governu, MAPKOMS, Francisco Jerónimo, Ministra Saúde, Odete Belo inklui diplomata internasionál sira.
Iha diskursu, Prezidenti Parlamentu Nasionál, Aniceto Guterres senti prekupadu ba feto nia kondisaun, tanba to'o ohin loron Feto sei kontinua senti injustu no sofre ba violensia iha sosiedade Timor-Leste.
Aniceto konvida entidade hotu atu halo reflesaun iha aspeitu bo'ot tolu hanesan, feto iha umanidade, feto iha evolusaun sosiedade no feto iha revolusaun politika no dezenvolvementu nasional.
Aniceto koloka no sublinã katak, esénsia husi reflesaun mak ser-umanu, katak ema iha feto no mane ne'ebé moris iha artikulasaun komplementar, nune'e forma sosiedade umana ne'ebé dinamika no integradu.
Maski nune’e, atual deputadu bankada Fretilin senti preokupadu ho situasaun ho istoria umana no sosiedade idaidak ne'ebé hatudu katak, feto mos sofre tratamentu injustu no violentu ne'ebé sei presiste iha sosiedade to’o ohin loron.
"Senti no prekupa ho situasaun ida ne'ebé mak ohin loron sai kestaun igualdade jéneru kolokadu transversalmente iha dezenvolvementu Sosiál, politiku no ekonomiku país nian," Aniceto Guterres hateten iha Parlamentu Nasionál, Kinta (5/11).
Aniceto hatutan, Timor-Leste hatudu nia preokupasaun ba estratejia igualdade jeneru no hatudu kompromisiu dezde restaurasaun Independensia tinan 2002, nune'e to’o ohin loron Timor-Leste hatudu duni feto nia partisipasaun iha vida sosial, politika ne'ebé aas liu iha ázia.
"Iha parlamentu 30% , iha institusaun ka entidade seluk kuaze 30%," Aniceto hateten.
Aniceto akresenta, asuntu partisipasaun feto aborda iha perespetiva igualdade jeneru, siginifika la’os eskluzivu feto nia problema, maibé sosiedade tomak ne'ebé kompostu husi feto no mane nia problema.
Entretantu, komemorasaun loron nasional feto ba dala-45 iha Parlamentu nasional ne'e organiza husi Grupu Mulheres Parlamentar Timor-Leste (GMPTL).
