Nia husu ezonerasaun ne'e, tanba tuir FRETILIN ninia hare ba embaixadór Timor-Leste iha Japaun, halo serbisu la’ós ona atu reprezenta estadu, maibé reprezenta fali grupu ka partidu nian.
"Embaixador nia mandatu atu reprezenta Estadu Timor-Leste iha Japaun, maibé realidade hatudu katak, embaixadór ida ne’e, la’ós reprezenta estado Timor-Leste, maibé reprezenta fali grupu no partidu, Liu-liu utiliza rekursu estadu nian hodi halo fali ajenda partidu nian," Branco kestiona liu husi konferénsia imprensa iha PN, Kinta (19/11).
Nia esplika, ema ne'ebé assumi kargu embaixadór plenu menus ba reprezenta Estadu, la’ós uza oportunidade goza previlejiu no imunidade nu’udár reprezentante Estadu.
Ne'e duni nia husu atu ema ne'ebé asumi pasta embaixadór Timor-Leste nian ne'ebé estadu tau fiar dezloka ba iha nasaun ne'ebé de’it, ema ne'e tenke reprezenta povu iha nasaun República Democrática Timor-Leste (RDTL) liu-liu mak tenke hamosu relasaun Estadu ho Estadu.
Relasiona ho aktu embaixadór TL iha Japaun ne'ebé hahú interese ba partidu maka bankada FRETILIN kondena actos ida ne'e no FRETILIN husu atu halo ezonerasaun imediata ba embaixador ne'e tanba hala'o servisu ladún sériu ba estadu.
Embaixadór Ilídio Ximenes rasik hetan pose husi Prezidente Repúblika, Francisco Guterres Lú Olo iha palasiu Prezidensial Bairro Pite, Dili iha loron 28 fulan Janeiru tinan 2020, liuhusi dekretu 21/2020.